本身好鐘意日本呢個地方，東京 關西 北海道等較為熱門嘅地方近年都去過了，當時諗諗下，剩低嘅地方其實仲有好多， 就研究下有無方法將一D我想去而又未去過嘅地方，用鐵路或者巴士串連起嚟， 係2014年農曆年實行。

前後構思咗差不多成年， 你哋可能都知，日本鐵路PASS五花八門，就算係關西都成10個8個，最後得出結論係，下面呢張5日PASS幾適合我。

山陽-四國-北九州周遊券

同時又想去一趟中部，即係飛驒高山，白川鄉果頭，呢條路線同上面條線係相反方向，咁就不如就喺中間嘅京都做基地，5日5日咁分開兩個唔同方向嘅TRIP，中間又可以喺京都HEA返幾日。

前後去12日，行程定咗，就到機票，去關西第1時間就諗起樂桃航空，當時大約2013年 6月，未有2014 2月機票，等到7月頭先開賣，叫做買到農曆年旺季機票，但唔平，來回都成3K，行李另計。

後期10月到香港航空重開關西廉航，來回連稅重平咗 ， 只係千五

D相未執，出住幾張白川鄉先，之後慢慢UPDATE