好友遊記絕大部分都係爛尾的。這是好友的傳統（ ） 。 所以今次我想出一篇不爛尾的遊記。希望係呢段艱難既日子，都分享下一D 無咁令人嬲嬲豬既閒情「日誌」。以下落黎我會介紹既，係沖繩既一個外島 -- 宮古島。

宮古島係沖繩眾多外島既其中一個。 以往要去玩，一般都會係沖繩本島搭內陸機過去。但始終都唔係咁方便。所以一直唔算係香港人既旅遊熱點。 今年 HKEXPRESS 開左條直航。情況即刻唔同哂。 由香港飛過去都只係兩個鐘既時間。同你過澳門都唔相差太遠。係航班少D 咁解囉。不過幾百蚊機票＋兩個鐘就可以飛到呢個沙灘同水質都同馬爾代夫有得揮既世外桃源，暫時逃避世間既紛紛擾擾，其實都真係幾抵的。 留意，宮古島只係沖繩既一個外島，仲要係好細個種，你千萬唔同拎佢黎同沖繩比。無論係旅客設施，購物娛樂，各方面都完全無得比。你要當佢係一個岩岩開發既避世小島，鄉間小鎮 。不過，係巿中心，你都仲搵到麥當奴同MAX VALU 呢類野既。 又唔駛太擔心。但坦白，如果你唔識開車既話，就真係無謂揀呢到了。除非你打算屈係酒店幾日，日日玩水曬太陽，邊到都唔去，咁就另計。
順帶一提，我去個陣係十月頭。我一直以為十月係去沖繩最佳既日子。因為避左七八月既大旺季，酒店價格會大幅下降。亦會較少遊人。又避開九月既颱風季節。無咁易遇到打風。氣溫方面， 不會熱到跳舞 ，但落水亦不覺冷， 仲係十分適合潛水。所以我上年就去左石垣島，今年就揀左宮古島。   但隨住世界氣候大變，呢個諗法都可能唔通了。 我十月初去既，去之前個個星期，宮古島正正被颱風橫掃，掃到應一應。好好彩， 我去既個星期就日日天晴。 但之後個個星期又有一個風打到黎（就係之後掃到關東一帶七個一片個個風）。 然後，執筆（執鼠？）之時，又有兩個風打緊黎。係呀，兩個呀！打得成架話 ，十月就前前後後打左四個風⋯⋯⋯ 你都咪話唔誇張。 下年再去既話，可能要考慮 11月先出發了⋯⋯⋯

宮古島其實係一個統稱。正式黎講，佢係由三個大島，三個小島所組成。三個大島分別係下地島、伊良部島，同埋宮古島。 三個小島就分別係池間島、  來間島同埋大神島。 除左大神島外，三個大外島同兩個小外島全部都有跨海大橋連接。 而呢幾條靚到震既跨海大橋，亦正正係宮古島既特色景點！我地搭飛機降落既，並唔係宮古島機場，而係下地島機場。所以，我地第一個景點，就係由下地島開車去宮古島時，所經過既伊良部大島。亦係宮古島幾條跨海大橋中最大、最長、最靚個條：