回帖︰冷凍療法有料到 熱刺兵雪完仲勁
球員通常最怕入雪櫃，因為被人「雪」，即係唔受重用，就算喺雪櫃出返嚟時，都可能因為雪到硬晒而冇好表現；不過，英超球隊熱刺今屆表現咁好，竟然就係靠放啲球員入雪櫃度！
熱刺雖然剛剛喺上周六場英超聯被伯明翰逼和，痛失 2 分，但呢支倫敦球隊今屆其實表現唔錯，目前排第 5，但只落後榜首嘅阿仙奴 6 分，喺歐聯又成功晉級 16 強，狀態可以用火熱嚟形容。原來，熱刺近況咁好，係同球會派球員接受氣溫攝氏零下 130 度至零下 140 度嘅冷凍療法有關。
據講，熱刺喺大戰之後就會送球員到赫特福德郡一間健康中心，並喺嗰度接受冷凍療法。球員首先要赤裸上身，但就着上厚長襪、戴上長手套，另外仲要用頭箍包住耳仔同戴上特製口罩，跟住就先入去一個氣溫攝氏零下 60 度嘅房到坐下「熱身」，之後就要喺一間充滿液態氮，並只得氣溫攝氏零下 130 度至零下 140 度嘅房入面 3 分鐘，之後就返回室溫（攝氏 20 度左右）嘅地方，接受醫生檢查。
健康中心嘅主理醫生連拿達話：「冷凍療法嘅原理係喺極寒環境下，人類求生本能就會啟動，大腦會確保身體各主要器官運作最好，保住生命，所以可以講係對身體器官嘅操練；而之後返到室溫『解凍』時，血管就會比平時擴張多 3、 4 倍，令到更多血液同埋氧氣到有傷患嘅地方，從而加速患處康復。」
之前熱刺嘅前鋒迪科爾、後衞京治及當臣，就試過以冷凍療治嚟治理傷患，而呢個療治嘅最新信徒，就係今季加盟熱刺嘅荷蘭國腳中場雲達華治。之前一向有「玻璃腳」之稱嘅雲達華治，雖然目前正受鼠蹊傷患困擾，但佢今屆傷患明顯減少，唔通真係同冷凍療法有關。接受冷凍療法嘅，除咗係熱刺球員之外，熱刺嘅副領隊邦特同埋一隊教練祖佐敦就都有接受冷凍治療，不過， 63 歲的領隊哈利列納就冇份。唔通哈利列納一向寒底，唔需要冷凍治療？
http://hk.apple.nextmedia.com/template/apple/art_main.php?iss_id=20101206&sec_id=25391&subsec_id=6041&art_id=14735960&cat_id=5026026&coln_id=5028941