回帖︰隔牆有耳：趣怪 App造福毒男

毒男 app：代嗌有落
普天之下廣大嘅毒男、腐女、御宅族，你們有福了。八方知道你哋成日面對一個困境，就係有句話唔講唔得，卻難以啟齒，即使匿埋練習過無數次，但對住嗰個人偏偏啞口無言，咪誤會，八方唔係幫你哋向意中人表白講「我愛你」，而係有個新發明，可以幫大家搭 Van仔時嗌「司機有落」！
外國人都啱用
對一啲疑似有社交障礙或者毒男而言，搭小巴嗌「司機有落」真係 mission impossible。在家靠父母，出外靠朋友，毒男出街就要靠呢樣嘢喇，有個高登巴打「 FULL_HD」，近日就寫咗一個名為「司機有落」嘅免費 App，呢個 App巴閉在只要㩒一㩒手機，就會播出「司機有落」呢句話，仲可以加入指定落車地點，例如街口、轉彎、燈口、橋底等等，唔使開口就可以嗌落車，好掂！
網民對呢個「司機有落」 App有彈有讚，恥笑無聊兼毒到冇朋友，又嫌發聲太假及唔夠大聲，不過亦有人勁欣賞 FULL_HD嘅創意，因為「唔使次次坐到總站行番轉頭」，大讚佢造福毒男之餘，個 App對聾啞人士、外國人以至新移民都使得，就算唔識廣東話都可以搭小巴嗌「司機有落」。 FULL_HD自稱係中五生，聽咗咁多巴打絲打意見，話整 upgrade version會加大聲及嘗試提供埋女仔發聲。八方充滿期待，可惜暫時只有 Android版， iPhone用家無福享受，而且呢個 App無放上 Android Market，下載請到此
http://andappstore.com/Andr......ations/apps/Get_Off_Minibus。
pf_lee@appledaily.com