回帖︰我大概明白你想講咩。你意思係，都未知呢個人係咪真係適合自己，打從第一日開始就決定追人，好似為追女仔而追女仔，而唔係為建立一段長久既關係而追求佢。我估你大概係迷惑係呢個思考模式中吧。

咁你可以先將個目標定為：「與J 小姐加深了解，建立進一步既關係」為前提，去接觸對方者。當然，其實有D 自欺欺人………不過如果咁樣可以令自己自然D ，舒服D，唔會變到成隻餓狼咁款，都不失為一個自我思考調節（兼且身體調節）既好方法既。
人與人既接觸同關係，本來就係要透過長時間既相處、了解、衝突、諒解，逐步建立出黎。唔單單係情侶關係，就算係普通朋友發展成莫逆之交，都一樣要經過時間既洗禮。你唔會有一個識左兩日既生死之交咁巴閉係話？亦都唔會有一個識左幾年但見唔到幾次面既知己者。關係係要雙方去建立的。就算係開始左拍拖，都唔代表已經修成正果。如果你既目標只係為左短暫既男歡女愛，咁係另一個話題。

其實J 小姐佢做咩架？學歷背景係點？家庭背景係點？有咩喜好？鐘意食D 咩？討厭D 咩？平時工餘時候會做D 咩打法時間？鐘唔鐘意運動？有冇運動？鐘唔鐘意音樂？對藝術或有關領域既野有冇興趣？金錢對佢黎講有幾重要？有冇金錢上既壓力？支出大唔大？收入夠唔夠？有冇咩願望或理想？最想係短期內完成既目標係咩？最近有冇咩特別想做既事？鐘唔鐘意旅行？有冇計劃去旅行？人生最想去既地方係邊到？有冇咩長遠既計劃？對家庭既睇法？鐘唔鐘意小朋友？有冇信仰？對信仰既渴求有幾深？對政治是否冷感？定係積極投入社運？是否支持環保？有冇身體力行？定係講環保但夏天開冷氣打邊爐？你仲可以問多一百條問題………但重要既，其實係你答到幾多條問題！

了解一個人，要全方位的。你宜家了解佢有幾多？有幾深？你同佢可能只係點頭之交，面書之友，甚至連「朋友」兩個字都未必稱得上（要視乎你對朋友既定義）。呢一刻，因為佢靚女，仲要人品唔錯，你對佢產生好感，人之常情。追唔追都好，你下一步本來就係要同呢個人加深了解。了解多左你先可以再講追唔追，或者係咪適合自己。你追唔代表你追到。你唔追………亦唔代表唔可以同佢一齊。只要佢追你就得了。
當然，亦有人係唔需要了解咁清楚，見到靚就夠了。追番黎先算。無所謂的。人人要求唔同。就等如，有人從來唔會睇食物包裝上既標籤，從來唔了解自己食左D 咩落肚到，有人鐘意花好長時間去研究究竟每日自己食左D 咩落肚一樣，逐個字上網查。我諗唔關對與錯的事，只係你自己對自己有咩要求吧了。

抱歉，我係一個好舊式既人，我只會從好舊式既方法思考感情問題。我唔係唔相信世上有一見鐘情，只係我自己未遇過，唔知會係點。一見就生滋貓入眼我就試得多。一見鐘情兩日追到手然後一生一世既例子，係我身邊未遇過（實在太不幸了）。所以比唔到呢方面既意見你。我只懂分享如何細水長流。希望你唔會嫌我太慢熱吧。