回帖︰freezefox:
我係打工仔。

freezefox:
點會哎。我咩人都駛唔郁既，個個都只係聽老闆一個人既話。我係叫得郁我班直屬既同事架咋。

唔好睇表面風光，其實背人垂淚架。

freezefox:
唔見左護照，被迫滯留係首爾………

唉………彈盡糧絕………呢兩日都唔知點過…………

freezefox:
唉………今日全日就係首爾撲黎撲去，又大使館又韓國出入境署，攪左一日。身上又無哂錢。電話通話時間又用哂（好彩仲有WHATSAPP）。連夜晚係邊到過夜都未有著落，幾時可以走又唔知，好鬼陰公…………

freezefox:
終於返到香港了………

freezefox:
出發去機場了⋯⋯⋯

freezefox:
尋晚半夜先番到呀！

出差兩個星期啦。中間返過黎香港兩日咋。

《Running Fox》

「呀！個頭好痛，好似就快裂開咁。」我瞓喺酒店房嘅床上，一時間有種斷片嘅感覺。

呢幾年，我嘅飛行里數比搭巴士都唔知多出幾多倍，一覺醒來，往往會有唔記得究竟而家喺倫敦丫，定係漢堡嘅時候。

用遙控制打開電視機，聽到把女聲大叫「都敏俊xi」。啊！無錯，我而家喺首爾，望住螢光幕播影緊嘅電視劇，有點不以為然，「呢套嘢重播又重播，都唔知有咩好睇，要睇星星，我唔好睇周星星！」

落床梳洗時我終於記番起，尋日我係去咗間韓燒店傾生意，都唔明點解傾嘢一定要飲酒，結果我畀人隊咗幾杯燒酒後已經暈陀陀，後來係點返酒店都已經唔清楚喇。

望望時間，夠鐘 check-out 返香港，喺酒店門口截的士直駛去仁川機場，準備離境時，竟然搵唔到本護照，明明上車時仲喺件大褸拎出嚟檢查過，估唔到綽號「Running Fox」嘅我都會犯呢種低級錯誤。但係，我好肯定本護照一定係喺的士上面，我即時衝出去停車處，當然，架車已經不知去向，好彩張電話卡仲可以用多半日，所以我即時聯絡我個 Agent 姐姐，希望佢幫我搵番架的士。我連珠爆發將個司機特徵、車內陳設，甚至車身有班短裙長腿女仔嘅廣告式樣形容畀佢知。

佢好快反應，用開朗聲線答：「係咪少女時代呀！」講真，我點知喎。

「唔…咁車牌係咩呢？」Agent 姐姐變番正經口吻問我。

「韓文喎！我唔識睇。」我頹然了。

「我建議你即刻去大使館辦臨時護照，我諗我只可以幫你改航班咋。」

事已至此，我連人帶喼匆匆截車去中國大使館，到達時只係下午四點十分，我正想由正門入去時，守門口嘅守衛截停我，用呼喝嘅語氣講：「關門了！」

「吓！未夠五點喎！」我內心以香港人辦公時間嘅思維發出疑問。

我將我嘅情況向佢提出，但個守衛一直頭向上望，而把口就不斷重覆「不幹！」

最後，我哋嘅爭吵聲驚動咗一個貌似比較高級嘅埋嚟，我馬上向佢求救。佢聽完成件事之後，用一種類似朱鎔基總理嘅語調回應我。

「這個嘛………我們…今天啊……不能辦理。……你呢……明天……再來吧。」

然後，無論我點解釋、懇求，甚至咆哮都不得要領，結果只可以暫時離開。

前路茫茫嘅我全日都無食過嘢，諗起尋晚間韓燒店嘅韓牛好似幾好味，所以就再返去幫襯，韓燒店嘅阿豬媽竟然一眼就認出我係尋晚嘅客人，佢熱情招呼我坐低，遞上餐牌又上茶又上小食，今日遇到咁多人，到而家至有「遠來是客」嘅感覺。

突然，隔離檯有個韓國大叔對住我講咗一連串嘅韓文，我一句都聽唔明，佢竟然走埋嚟一手捉住我，將我拉出店外，我正想反抗大叫之際，眼前出現一架車身印住一堆長腿廣告嘅的士，原來呢個大叔就係今日車我去機場嘅司機，佢打開車門將我本護照物歸原主。我搭住佢膊頭同佢一齊返入韓燒店，舉起阿豬媽為我地準備好嘅燒酒乾杯。

@freezefox