回帖︰宜家一隊波有冇能力爭取好成績，就係睇你控制唔控制到傷兵問題。 傷患幾乎係無可能避免，所以如何減低個影響就係關鍵。所謂減低影響，一，有合適既替補。二，再簡單啲，減少正選既出勤。即所謂既輪換。

以前輪換，係你一場，我一場咁輪換。周末踢呢 11 個，周中抽起三幾個用副選。但缺點係，正副之間始終有差異，你今場夾呢個，下場夾個個，都係會欠少少默契。 加上，有時唔係話你想換就換，周中個場遇到大戰，又要全員正選上陣。個輪換就亂哂大籠。

史洛宜家奉行場場輪換。係一場波入面進行輪換。你踢 70分鐘我踢 30 分鐘，下場就我踢 70 分鐘你踢 30分鐘。 感覺上，球員場場都要踢，但又唔駛場場扯到盡。但又因為場場都有份踢，狀態一直可以維持。球隊亦更加熟悉如何配搭。 而且，兩個人爭一個位，但又唔會長期坐冷板，總有機會表現，良性競爭下KEEP 到球員團火，無咁易厭戰。 之前你間唔中都會見到，隊波明明之前都好地地，突然幾場走哂樣，啲人好似跑唔郁咁。其實就係厭戰感作祟。 宜家有冇？都有架，但史洛可以利用半場休息時間去調整，換一兩個新血入嚟，成隊波又即時生返哂。唔係一次半次，好幾次都係咁救返隊波。

所以，史洛唔係識降頭，而係佢既調動同配置，令利物浦暫時都可以免於傷兵既影響。大部分位置都有兩個人替補，正副選之間亦唔會話一天一地，正選好勁副選食屎。而係真係可以相互競爭的。所以球隊一直可以保持新鮮感。保持活力。呢點係史洛最大既功勞。