兩篇都係垃圾。
我唔會咬阿嬌有冇私心，係咪表面睇既淑女，東周係咪全心踩低同行，聲討大會入邊講野既人邊個有嫖妓邊個係滾友。因為呢d由頭到尾都係分散人注意力拉開視線扯東話西既文字遊戲。兩篇義正詞嚴既文章，竟然可以由頭到尾提都唔提下點解今日會發生呢件事，點解便利比到個機會人地圍佢。
其中一篇竟然仲話今次事件只係「小小採花賊」！天啊！佢知唔知自己講緊咩？非禮唔係罪行，因為強姦更嚴重。你被人非禮只係你遇上小小既採花賊…………
張學友同劉德華正派啦。佢地講既野無私心啦。
同一種行為，我將個偷拍器放係女厠，影完人相跟手放上網！我就係色狼。我已經犯左刑事罪行。但同一種行為，記者做就可以用「新聞自由」、「食得咸魚抵得渴」、「我影你係比面你」呢d似是而非既道理黎掩飾。
我地無需要理會阿嬌慘唔慘，佢有冇被人影到，係咪借意宣傳。呢d通通唔係問題所在！問題只有一個，記者係咪有權偷拍。係職業操守上，對一件完全無新聞價值既事情進行呢類嚴重侵犯人私隱既行為。
一個妓女，若然係不願意與對方進行性交既情況下，被迫咁做，都係強姦！你唔可以因為：「喂，佢平時都慣架啦！」「車，雞之嘛！有咩所謂？」「擺明屈錢之嘛！妓女都係為錢架啦！」呢d完全講唔通既道理而認個妓女抵死！強姦人既無罪！
何況佢只係一個藝人！
同一件事發生係自己身上，就無咁多風涼話講架啦。
我唔擔心阿嬌受唔受得住，心靈有冇創傷，演藝人有冇得到應有既尊重，私隱條例係咪足夠保護市民……等等，等等！我最睇唔開既係，今時今日我地既是非觀，道德觀，價值判斷……竟然可以扭曲至斯………
我地等同教緊我地既下一代，偷窺係無罪架！偷影你女同學既底裙只係玩下，無傷大雅架。
人……係唔需要尊重架。
[ 本文被freezefox在2006-08-30 02:44重新編輯 ]
