尋夜同成班朋友上深圳食飯，開頭我無留心其實係食咩，只知道係自助餐，hk$165一位。心諗，咪得個平字，山長水遠又要過關又盛去食個自助餐，駛唔駛咁煩？
點知去到先知係鐵板燒自助餐！即係有個師傅幫你燒，前面一大塊大鐵板既日式鐵板燒！嘩，呢d 係香港食一位無三幾百唔駛旨意落樓架喎。即時又有番d 期望。
我地八個人，已經可以包間房，齊齊圍住將鐵板枱黎等食。我地幾個遲左少少，所以朋友一早已經坐低order 左野燒緊。所以我地一黎到已經有得食。先黎丁個燒生蠔……我唔鐘意食蠔既都覺得美味極了！然後燒帶子、肉眼扒、薄燒西冷、羊仔扒、手找羊仔骨、牛筋骨、銀雪魚、比目魚、多春魚、秋刀魚、老虎蝦、九節蝦…………多到你食唔哂。仲要任飲。汽水啤酒個d 唔好講，連紅酒、日本清酒都係任飲！仲有好多特色甜品………
嘩，一人先百幾蚊，佢點回本架？
結果食左個零鐘，我已經飽到上心口，今朝起身都仲回味緊！十分值得推介。
呢間野個名叫大漁，係深圳既福田、蛇口、南山、羅湖……等等地方都有分店，加埋東莞有兩間，全部有八間。我地尋晚去個間係福田中信城信廣城入面，係黃崗或福田口岸搭的士去，唔駛十分鐘，車費都係22。由羅湖去搭地鐵都係四個站。大家可以上網搵下呢間野既資料。
不過有一樣野唔好，我去個間係商場入埋，十點鐘中央冷氣一關，就好悶勢。所以唔好遲到，八點半即刻食，食到十點差唔多收工就開始食甜品。咁就無咁辛苦。
