鄭中基、蔡卓妍記者會全文
鄭中基與蔡卓妍昨於九展舉行記招，兩人一同步出，待記者拍照約兩分鐘後才就座， Ronald拿出預先準備好的講稿，並先發言。
鄭中基：
「好多謝今日大家嚟到參加我鄭中基同蔡卓妍嘅記者招待會。（深深吸氣）結婚，係一個事實（阿 Sa望向鄭中基）， 06年我哋兩個係非常之咁開心，做咗呢個決定，而亦都得到雙方家長嘅支持下，我哋喺洛杉磯註冊結婚。
一路以嚟，我同阿 Sa對於我哋嘅感情，同埋結婚嘅態度，我哋都係覺得係我哋兩個私人嘅事，亦都唔需要，亦都冇必要同大家去公開。而我哋雙方面亦都同意呢一個處理嘅方法（阿 Sa點頭和應）。咁我知道喺呢幾年內，外界對我哋雙方嘅關係嘅猜測，以及不斷嘅失實報道，令到我哋兩個都覺得，今日係有必要向大家去作出一個交代。而亦都係我哋今次，亦都係最後一次，同大家嘅交代。
喺結婚呢幾年，我哋生活同埋大家都係非常之咁開心，而經過呢一個時間，大家嘅共同成長，同埋對彼此雙方有更加深入嘅了解，發覺我哋分手，係對大家日後係比較好啲嘅。所以，最近我哋同大家宣佈我哋分開，亦都係一個好理性嘅情況下做出一個咁嘅決定，而呢一個決定，亦都係一個事實。
我喺度再強調一次，我哋嘅分開，係冇涉及任何第三者（眼神堅定），亦都冇涉及一啲一切外間所傳，失實嘅報道。我好相信，離婚，亦都係大家跟住落嚟會追問嘅問題，呢件事我哋已經處理緊，而所有一切法律程序要做嘅嘢，我哋亦都會做。
（低頭數秒，托眼鏡）儘管，（強忍淚水，阿 Sa則在枱下輕拍 Ronald的大髀，然後再遞上紙巾， Ronald拿紙巾輕抹淚水）我哋唔能夠（哽咽）成為夫妻，但我哋的而且確有過一段好開心嘅時間（向阿 Sa點頭示意，除眼鏡抹眼淚），更加希望我哋可以成為永遠嘅好朋友。所以我喺度好想多謝大家，同埋好希望大家可以畀些少嘅空間我哋，多謝。（飲泣，抹眼淚）」
阿 Sa接着發言：
「其實一直以嚟同…… Ronald，由開始拍拖到結婚到即係喺大家分開，其實，大家都係有共識地去做每一樣嘅決定，同埋我哋兩個人嘅選擇，咁我哋結婚係除咗我嘅選擇同決定之外，我哋亦都得到我哋嘅家人同埋有啲朋友嘅支持，咁所以一路以嚟我哋都覺得，呢一樣係我哋兩個人嘅事情，所以冇選擇同大家交代。因為我哋覺得呢一樣係我哋嘅私事，好想呢個係成為我哋一個小小嘅秘密。
（舔一舔嘴唇）咁一路以嚟，其實都以為雖然我哋係藝人，但係都可以有一啲屬於我哋嘅私隱，咁但係原來、原來係（想哭，鄭中基伸手安慰）原來係藝人係唔可以存在有私隱嘅。咁令到今日已經呢一件事唔係淨係牽涉（鄭中基將紙巾遞給阿 Sa），唔係淨係牽涉我哋兩個人嘅事（抹鼻），已經係去到一個地步係已經牽涉到好多唔同嘅人同埋事，一路以嚟唔選擇去公開係因為，我哋都達成一個共識，係希望可以保護大家兩個嘅關係，同埋對方，同埋我哋嘅屋企人。
咁到到而家，係已經對好多人係造成一個傷害，亦都唔希望會接住落嚟係有接踵而嚟嘅傷害。咁所以今日就同大家一齊去交代呢一件事。（停頓數秒）希望嚟緊大家都可以畀多啲空間我同埋 Ronald，咁我哋（兩人互望）都係好朋友（鄭中基點頭），咁希望我同埋 Ronald都可以嚟緊生活可以好愉快，多謝。（阿 sa抹眼淚， Ronald搭阿 Sa膊頭，阿 Sa輕聲問 Ronald有沒有補充， Ronald輕輕搖頭，兩人離座，向眾人鞠躬。）」
