尋晚變一變陣，英格蘭既表現叫做好番少少少少……不過呢隊波都係淨係識打順境波架啦。唔係早早有入球尋晚都唔知羸唔羸到。
新做正選既迪科爾，入左全場唯一一球，叫做有交待啦。之後有一球抽射，有一球柱邊，機會都唔係少。但掂波次數真係好少。最主要問題仍然係無供應。好幾球佢企位比朗尼更好，但D 隊友都寧願交比無態既朗尼而交比佢。出得佢，預左要打突擊，打快攻，無D 直線比佢跑，下下要佢學希斯基去爭頂個D 九樓跌落黎既高空波，咪即係玩佢。計我話，出佢夾高治，咪鬼出朗尼好過。
朗尼尋晚仍然無態。上半場連波都HOLD 唔到，跑又跑唔起。唔知係咪有傷患，同之前係球會既表現簡直係兩個人。既唔見佢爆入禁區，亦無哂D 幾十碼遠距離勁射。傳波無又力，真係無態得幾得人驚！出佢，其實真係浪費左一個位，連駁腳佢都有問題。唔解決朗尼呢個問題（一係佢突然操番起個態，一係就直頭唔出佢），英格蘭唔會有運行。
謝拉特仍然缺態。但已經係英軍中打得最好個幾個之一。賽前阿SO 話佢會拉低英軍既實力，但事實放在眼前，英軍根本靠哂佢。無論係直線傳送，個人突破（少量啦），打ONE /TWO，好幾次入肉既攻勢都係靠佢組織出黎。可以話係英軍既重要進攻泉源。但比起佢當FIT 個陣，都唔知有冇六成。打得最好個幾個都係咁既話，可想而知英軍宜家既狀態係幾差。
相對於謝拉特，林伯特就真係唔知係球隊到有咩作用。你話米拿都叫出下波哎，林伯係球隊到，究竟係擔當咩角色？負責咩工作？有佢同無佢有咩分別？我最常見到林伯做既野，就係交波比企係佢隔離個個人。最短個次可能得兩碼，最長個次都唔知有冇十碼。呢D 傳送要黎做咩？全無作用。家陣玩馬騮搶球咩？盡快交個波比另一個等自己唔駛做馬騮呀？唔一定係林伯特個人有問題，但球隊真係唔需要一個中場幾碼駁腳既角色囉。換個有突破能力既入黎咪仲好！
巴利尋晚就真係睇到人眼火爆。佢個位本來十分重要，要黎解放雙特（但實際只係解放左謝拉特，林伯仍然無影），所有防務都要靠佢。但尋晚既表現，係全隊最差個個。防守無力之餘，經常甩漏！幾次對手既反擊都係因為佢既低級犯錯，誤傳，所引致！真係命都無！唔用佢咩？又唔得喎，因為呢個位竟然無後補球員既（點解唔選柏加或者史東哎………），用佢咩，再係咁打落去，死路一條。即係，用唔用佢都係死路一條………陰公。
米拿已經係尋晚羸波既力臣之一！迪科爾入個球係佢助攻，朗尼中柱個球又係佢妙傳。多次突破右路出到波，出既波既質素已經係全英軍最好。但係咪真係打得好呢？我覺得唔係囉。只係對手既左閘差到無倫者。米拿完全無速度，D 扭波好似食左幾擔豬油咁。輪輪盡盡，但偏偏左扭右扭又比佢扭到喎。咁你話係佢扭波勁定係對手防守差勁？我好擔心入到16強，對住德國既閘，佢仲出唔出到波。其實佢只要扭少DD，直接DD，佢既出波質素會係英軍一項強力武器。當然，最好出埋高治黎配合啦。但佢偏偏捨強取弱，好多時候第一時間唔肯出波，係要扭兩扭，將自己既弱點暴露人前。希望佢下一場肯改變下個打法，打得再直接簡單D 啦。
後防泰利、莊臣、高爾都算表現稱職。泰利仲好搏命添，有一球飛身用個頭封殺對手射門，命都唔要，真係搶哂分架！但唯一漏動就係另一個中堅位。厄遜真係唔多得。慢、無速度、唔夠快，都算。打黎患得患失。最尾八十七分鐘個下大攤，對手把握好少少英軍出局了！仲有得打？唉，雖然無咩可能，但真係想卡比路用多臣啦！穩健好多架！
占士今場受既壓力唔算好大，幾次出迎都算做到野。開局個球撲救仲羸得唔少掌聲，暫時個籠都係要靠佢架啦。條友仔認認真真唔玩神化，其實都係一個幾高水準既鋼門黎既。
祖高爾出得個十幾分鐘，仲要主要玩角球旗戰術，都無咩可以評了………
