講真，若然今日既利物浦排緊聯賽第一，你估有幾多人會關心阿古蘭尼有冇得出哎拿？就算有人問，都唔會構成任何「質詢」啦。賓佬一句：「我打得咁順，我做咩要變陣？出左錯你負責呀？」你都即時收聲啦！
今日問點解唔出阿古蘭尼呢個問題，背後既真正問題，其實係：「賓佬，你仲有冇咩計可以力挽利記宜家呢個弱勢呀？」呢個先係真正大家問緊既問題。
可用既人用盡，可調既兵調盡，一場又一場咁失分。事實明顯講左比大家聽，再唔求變，利記係咁先！咁點變哎？炒領隊係一變，但我地無錢！變陣變打法係一變，但我地無兵！搵黎搵去，得番一個可以變既，就係阿古蘭尼！但其實呢個係未知之數。無人知放左佢入黎會點。真係成隊波即時打番起咁神奇？定係放左入黎都改變唔到任何現況，甚至更差都未定。無人知。賓佬心中有數。球迷如我，只能係外面估估下。因為我地都唔知阿古蘭尼既「真正實力」，或者更正確咁講，佢加入利記隊中所能起既實際作用。我地唔知。
但已經去到咩方法都用盡既今日，得番呢個方法可以試，即使結果未知，自然人人都想試。「唔試過你又點知唔得呢？」球迷都係咁諗。但賓佬呢？佢會唔知？佢睇住呢個球員日日操練，狀態如何，佢無可能心中無數。一直唔出佢，會唔會就係因為出左都無用。到時連比球迷最後一個希望都無埋，咁利記同佢就仲大鑊………
所以，今日我地唔係真係問緊賓佬點解唔出阿古蘭尼，我地係問緊佢：「大佬，你仲有冇咩符fit 未出呀？有就唔該你出埋啦，再和落去，唔好話big 4，前七都無份呀！」
