澳門又爆大鑊，深層次矛盾換咗新特首都擺唔平，要開水炮鎮壓，原因好簡單：人人冇啖好食！唔係失業嗰隻冇啖好食，係真正搵唔到食！澳門人近日鬧得最勁嘅唔係何厚鏵，唔係崔水安，而係阿蘇──以抦人為樂、鬧人為榮、教煮餸嗰個蘇施黃阿蘇。阿蘇係澳門犯眾憎，事緣佢介紹澳門美食嘅節目出街後，惹來大量香港人過去搵食，經佢點評嘅舖頭通通變晒長龍店，搞到本地人冇碇企，由細食到大嘅豬扒包、牛雜、雲麪，以前一叫即到，家陣排隊幾個鐘頭都未有嘢落肚，真係火滾！
街坊舖頂唔順要休息
多人幫襯本應係好事，不過好多食肆老闆卻有苦自知，事關阿蘇效應僅虛火一陣，遊客食一、兩次就冇回頭，得罪街坊客卻冇咗長期客仔，得不償失；位於沙梨頭噚日警方開水炮位置附近，一間以乾炒牛河馳名嘅食肆，據講早前貼出休業告示，表示經阿蘇推介後客似雲來，「雙手難敵眾口」，舖面人頭湧湧，為免得失多年主顧，決定「歇業半月，休養生息」。
現居澳門嘅資深傳媒人譚志強同八方講，據佢所知呢間食肆老闆真係多得阿蘇唔少。港客湧至，老闆炒牛河炒到手軟，鑊都冇力拎起，因此要休息兩周。譚志強指澳門人同香港人只顧搵錢唔同，家庭式經營重人情、品質多過賺錢，所以好多食肆老闆都唔想阿蘇臨門，「反正澳門家都唔憂客。」
街坊舖俾阿蘇逼到落閘震驚全澳門，澳門近日有唔少反蘇聲音，澳門人埋怨老店紛紛被阿蘇「攻陷」，阿蘇喺節目中叫食肆老闆大幅加價更掀起倒蘇高潮，有人喺 facebook發起「唔好再比啊（阿）蘇~~~亂嚟」群組，更有網民要求澳門當局封殺阿蘇，以還澳門人一頓安樂茶飯。
做騷吸客殃及小市民
不滿阿蘇嘅民怨谷到爆，深層次矛盾係澳門獨沽一味靠旅遊業支撐經濟，要搵名人做騷吸引遊客，講飲講食開到荼蘼，連街坊舖都唔放過，最終殃及小市民，為免引起「蘇亂」影響社會和諧，八方擔心崔水安會出動水炮，對準港客長龍，射呀！
pf_lee@appledaily.com http://hk.apple.nextmedia.com/template/apple/art_main.php?iss_id=20100502&sec_id=4104&art_id=13987949[ 本文被utadahikaru20在2010-05-03 12:06重新編輯 ]
