《選戰》已經播完，後段收視因為缺乏宣傳，已漸現疲態，更曾有傳因為收視失利，加上港視唔同演員續約，故就連《選戰》續集即使已有劇本，仍然有機會難產，幸而話題之作《導火新聞線》本月10號就出街，題材緊貼現實而且具爭議性，應可扳回一仗。
日前於港視春茗上，主席王維基仲表明年中會開拍新劇，不過睇番噚日公佈嘅最新收視，直播及點播收視都比上月數字低。(連結:
http://bit.ly/17XBwQ6 )
先講點播。截至本月3日為止，港視每日平均收看節目嘅獨立登入用戶數目只有45,000人，較2月24日前少足足12,000人。
直播收視方面，播放港視節目嘅每日平均裝置數目得有99,000，比上月份少17,000台。至於每日平均收看時間，無論點播定直播都起跌不大。
再用二月條數對比番一月嗰陣。點播方面，二月初嘅收視，已跌至只得約6萬用戶，較一月底減少1,300戶，更較開台時每日平均逾20萬嘅高峰大幅下滑；至於直播，有指二月初亦比一月大幅跌約七成。王維基曾表示，收視對比開台初期大跌，係因為節目着重創新，開台之前已預料收視會較波動，佢仲話:「唔係每一次都適合所有觀眾層。」
至於港視App，下載數(IOS Apps及智能電視、支援Android制式嘅電視機頂盒)同登記用戶數目都有1-2%的上升，只係得Android Apps下載次數微跌，但港視由開台時幾十萬收視跌到目前得5位數，再係咁跌，連HKTV mall都會受影響，就算再開新劇，只怕都難吸番嗰班流失咗嘅客。
港視發言人就透過短訊回覆：「香港電視自啟播至今，已播出六套劇集，包括《警界線》、《選戰》、《來生不做香港人》、《童話戀曲》、《我阿媽係黑玫瑰》及《第二人生》，劇集的題材比較創新而且廣闊，所以收視有起跌是正常的事，會隨觀眾口味而變動，而香港電視亦能夠從中更加了解觀眾的喜好和行為，有助日後的製作。」
