引用第27樓萊斯特於2006-10-24 02:46發表的“”:
好認同e個事實,但唔會張佢睇成"大部份人都係講一套，做就另一套"既成因
我地係可以選擇 唔講 / 講自己真係做到/會做個套.....
「講一套，做一套」可以分成兩種：
第一種：你真係想做，但經常地做唔到。所謂立志行善由得我，行出來不由得我。呢個係個人意志是否堅定，有冇毅力既問題。非關道德問題！例如，你好想日日讀好d 書，你會同人講：我今日一定要溫完書先上好友。但最尾你都係未溫好書就上好友。
你可能鼓勵人要讀好d 書先去玩，結果你做唔到，人地就會話你「車！你咪又係讀一套做一套！」
但呢套「講一套，做一套」，唔可以全盤否定。的確，佢做唔到佢自己講既野，但有兩點要注意：
1. 佢曾經有呢個目標，亦曾經向呢個目標進發！
2. 佢講出黎既動機係好既，亦係希望人地向好既目標進發！
同樣地，標榜某d 道德標準，要求大家去做。但同時，自已亦未必做到，係性質上，可以話係一樣！
有好多人就會將呢種行為「定性」為「假仁假義」，「假道學」。抱歉我未能接受。我接受佢做唔到佢自己要求要做既人，但我唔認為佢做唔到就等奴假道學。關鍵始終係佢係咪曾經有心想去做到！若然佢出於真心，我至少欣賞佢有呢種情操。
若然人人都以自己「可以做到」既野為「最後目標」。做到先講，做唔到或者可能做唔到既都唔駛講，咁其實變相係將自己既道德觀同價值觀貶值。要「講果套，做果套」唔難架。個標準有咁低得咁低咪得囉。
當然，第二類「講一套，做一套」既就岩岩相反。佢從來都無諗過要做自己講個套。講出黎，只係將個道德包袱壓係人地身上，自己就話之你。叫你唔好吸食軟性毒品點知自己去貶毒。叫你孝順父母點知自己趕阿爸阿媽出街訓。呢類情況當然又另當別論。
以芝士姑be 既個case，我當然會定性佢為第一類。平時佢叫人做人要積極，要向好方面諗，要堅強………全部「應該」出於真心。亦係為他人著想既！動機係善意既。今日，佢過唔到呢關，佢自己反而選擇自殺。當然，呢個係一個極壞既例子。因為平日聽開佢節目既朋友，無形中就會認同左呢個做法：「佢咁堅強咁硬淨都自殺，可想而知，自殺其實都唔係咩咁出奇既事者。」呢個當然係一個唔好既結果。
但另一方面，我地應該體諒佢。人本來就係軟弱既。「堅強」，只係我地面對逆境時攞出黎既擋箭牌。有時攞唔出就係攞唔出。一時諗唔開，又無人開解到，意志薄弱之下，選擇愚昧既方法解決，並非不能理解。所以我地都會體諒佢。唔會話佢「講一套，做一套」。
