好，攪掂埋D手尾，個「不爛尾遊記」就正式埋尾了！
宜家等我介紹下宮古島幾個熱門旅遊景點。講得熱門，即係係旅行團都會去。你預左實會撞到一車車既旅遊巴載住一車車既遊客到訪。所以，一係你就早早出發，避開人潮。一係你就係個景點到坐耐少少，等人潮離開。一般大巴同大巴之間都有少少時間空隙既。即係，呢批走左，下批黎到之間，好彩都會比你撞到「真空期」。咁咪可以影到D 無咩人既靚相囉。
第一個景點係位於宮古島東南最篤既一條細長海岸線 -- 東平安岬！仲有個燈塔係到架。
我地個日係星期五，去到已經係下午四五點黃昏時間。唔知係咪因為咁，所以無咩遊客。一架旅遊巴士都無。私家車都係得個三幾架。成個東平安岬既遊人加加埋埋都唔知有冇十個人。 好寧靜。
不過同一般地形景點一樣，你置身其中個陣，其實你係睇唔到佢有咩特色的。真真正正不知盧山真面目。呢D 地形景點，都係要遠遠望過去先見到真貌。不過宜家我地有航拍，方便多了。整張全景圖睇睇：
係咪好有趣的海岸線呢。 宮古島好多呢類成條尾巴咁款既超長海岬。之前睇既池間島大橋既連接海岸都係。一陣會POST 既西平安岬亦是如此。
