銀行本身就一定係賤架喇，仲記得幾年前我阿嫲(當年佢都80幾90歲)俾銀行 tum 左買一個長線基金，要擺成十幾廿年先可以攞返錢果隻(中途攞要 penalty 到飛起)。於是我去銀行度鬧佢鬧到飛起，頂佢呀，80幾歲要人擺十幾廿年，結果銀行死死氣咁俾我幫佢取消左佢，攞返錢唔駛俾 penalty……
我以前搞基金既，都認識一的財顧(IFA)，佢地賣既都係公司叫佢地力推既產品(通常都係 commission 收得最多既產品)，全部都係著眼係公司既利益，而唔係投資者既利益。所以我從來都勸人一定要自己學理財，千奇唔好相信任何所謂既投資顧問。
至於好多人今次鬧政府監管不力，我又唔係想幫政府講野，不過呢樣野全世界既金融中心都係咁上下，每年有千千百百隻新產品推出，監管得太嚴又會影響金融投資業既發展。
講返今次呢件事，一方面雖然同情班苦主，唔贊同銀行銷售既手法，但係另一方面自己對自己既決定都要負上一定既責任。無知並唔係一個藉口，銀行職員同你講呢個產品風險好低，老實講佢地亦都冇講大話，用任何 historical model 黎計都係低風險，只係今次遇到百年難得一遇既情況，唔係任何 model 可以計算得到。所以今次呢件事，雙方面都要負責，銀行對自己既銷售手法要作出賠償，苦主去買一的自己完全唔理解既產品亦要負責。至於要政府用納稅人既錢去賠償，呢種輸打贏要既講法就十分離譜！
