轉貼某分享
-----------------------
老公好鍚我, 唔準我返工, 唔俾我做家務.
不過佢管理一頭家, 定出好多古怪規矩, 令我生活上產生好多不便.
例子一:
佢好乾淨, 成日最緊要洗嘢, 有時啲外套, 我覺得可以著幾次至洗, 佢次次一見我著完就馬上攞去洗.
咁都唔係好大問題, 買多啲衫替換咪得囉.
但係, 佢除咗鐘意洗衫, 仲鐘意洗袋洗鞋.
我試過買啲幾百蚊一對鞋或一個袋俾佢洗兩三次就變晒形報廢.
佢個理由係, 如果啲鞋就咁放响地會封塵, 所以一定要放鞋櫃;
但係如果啲鞋未洗就放入鞋櫃, 會搞到鞋櫃好臭, 所以一定要次次出完街就洗鞋.
我鬧佢洗太多, 佢就話而家啲鞋用料唔靚, 所以經唔起佢成日洗.
心情好灰, 我而家只夠膽買100蚊以下既鞋同袋, 但係佢咁搞法, 一對鞋最多都係著兩次, 好浪費金錢.
By the way, 我老公今年41歳, 我今年29歳, 有無同老公差唔多年紀既人可以話我知, 佢嗰年代啲用料係咪真係好過而家好多架? 真係可以經得起成日洗?
例子二:
我屋企1000呎, 總共有三個洗手間, 佢話為咗乾淨, 所以要分類.
洗小鳥各式用品一個洗手間, 洗衣服一個洗手間, 人類使用佔一個洗手間.
點解我屋企得兩個人住, 三個洗手間, 都仲要搞到爭厠所.
例子三:
佢咩都要啲顏色perfect match, 屋企啲家私全部灰色, 其他廚房及厠所用品要白色, 而且唔可以見到任何logo.
我幾經辛苦至買到一個佢唔介意我放响我書枱既厠紙筒.
買唔到白色厠紙筒, 佢就唔準我放厠紙响洗手間, 佢話會影響佢設計完美既洗手間.
人類使用厠所响我睡房入面, 接近屋頭位置; 但全屋唯一厠紙筒响屋尾既書房, 如果我瞓醒想去厠所, 要跑去屋尾攞厠紙, 再走返去屋頭個厠所, 去完仲要跑返去屋尾放返個厠紙筒响書枱, 否則萬一佢見個厠紙筒放响佢認為影响佢設計既地方, 佢好快又會掉咗.
By the way, 如果各位有响邊度見過有純白色無logo或花紋既厠紙筒, 唔該話我知邊度有得賣, 多謝!
例子四:
佢連沐浴液洗頭水護髮素個樽上面啲花都唔能夠忍受, 每次買完呢啲嘢返嚟, 都要放入佢另外買既白色樽入面, 至可以放入厠所俾我用.
佢仲要買到個樽一樣款, 搞到我都唔知邊支係洗頭水, 邊支係護髮素.
成日想洗頭嗰陣吱咗啲護髮素出嚟, 想護髮嗰陣又吱咗啲洗頭水出嚟.
我提議可唔可以响樽面寫明邊支打邊支, 佢又話"好似老人痴呆咁, 好肉酸".
例子五:
上面都提到佢緊張啲用具既花紋同顏色.
曾經何時, 佢未揾到啱佢心水既水杯, 唔準我買任何杯, 只準我買透明即棄膠杯.
終於俾我揾到佢覺得ok既杯, 我提議"你要求咁高, 好難買嘢, 不如呢個啱又唔貴, 我哋買多啲返屋企丫"
佢竟然話"同款既嘢只可以買三個, 否則放十幾廿個同款嘢响屋企用,會好肉酸"
唉~想點呀, 又要純色, 又要無花紋, 又要無logo, 膠既話純色得嚟仲要唔可以隻色cheap, 終於揾到又唔準買多啲.
我睇完真係無言
