麥兆輝、莊文強：拍《竊聽3》源於憤怒 《竊聽風雲3》導演麥兆輝家裡有一個大露台，面向無敵海景，是他與拍擋莊文強吹水、煲煙的地方。
幾年前，伸手可觸的「屏風樓」拔地而起，海景變成一道牆。麥兆輝睇文件、找圖則，追查下去，發現背後涉及不合理的地產規劃，
心裡有兩個疑問，「點解得？點解政府會畀？」麥兆輝、莊文強說，將《竊聽風雲》第三集瞄準地產，是源自他們切身「憤怒」。
地產成共同貪念 兩位導演一人一句指出，地產問題背後，不單是霸權肆虐，而是地產已成為香港人共同的貪念：
「竊聽第一集，2009年上映，講散戶，第二集，講大戶做市，已經由千幾萬講到幾億喇，仲有咩嘢個貪念再大啲呢？一個集體貪念，就係土地。
不但止係地產商，有樓嘅人都想快啲升、快啲升，升多啲，你原本間樓係二百萬樓，就想升到四百萬，四百萬想升到八百萬。」
（麥兆輝、莊文強）
拍金融拍地產 無競爭 莊文強有不少朋友做地產、金融，「十幾年來，聽好多故仔，好睇過武俠片。」將題目聚焦新界，也是把地產業朋友口中的現實，發展成故事。
不怕題材趕客？莊認為正好相反，故事夠「精采」，題材「獨特」才去做，「我覺得好睇，我覺得無人去做呢啲題目嘅故仔…
香港電影業好跟風，但拍完《竊聽二》，都叫好收得，都無人做同樣題材。」香港人最關心的金融、地產，港產片反而甚少取材，變相造就他倆做「獨市生意」。
率先曝光的土豪惡霸形象，已贏得掌聲。莊文強叫觀眾不要期望電影「妖魔化」原居民，「我哋關心人物，例如（電影中的）方中信考慮係咩…
我反而希望將佢哋切身嘅問題，話畀大家聽，等觀眾去感受。」麥兆輝續道，丁權階級其實也是貧富懸殊，有人賺大錢，
有人被壓榨，「（原居民差距）都係拉得好濶，都係貧富懸殊，差距好大。」
了結霸權 要靠公民社會 《竊聽》預告片一句「丁屋係時候了斷」，引來不少人心底叫好。不過，在電影當中，丁屋終結，換來只是利益再洗牌，扶植起另一個霸權。
莊文強解釋，因為人性始終如此，追求利益最大化，制度改變，「聰明人」一定會鑽盡空子，電影自然沿此推進。在現實要真正了結霸權，
可能要靠公民社會，「公民社會唔單止係加『公民』兩字，就安居樂業。每一個人都要付出。」
莊文強舉例說，拍擋麥兆輝正正因屏風樓問題，參與大廈業主立案法團，「因為佢覺得唔公平，唔公平要行出嚟…
應該每一個人都咁係諗，見到有啲嘢唔啱，出嚟講。唔係剩係講，應該去做。」
土地係用來滋養生命 他倆亦身體力行用電影表達自己對土地正義的訊息：
「我提出一樣嘢，土地係用來滋養生命，可能而家大部分人都覺得好戇居，大部分人應該會接受，你咁大幅地賣咗去咪發達囉…
點解我哋唔慢慢嚟，坐低傾點，點樣去解決呢個問題，而我哋咁急去做一樣嘢，叫做「發展」，呢個係我嘅睇法，
當然我哋兩個成日都覺得，啲人覺得我哋咁諗係癡線，但我好想講，咪係部戲裡頭講…
我哋係咁迫自己去追上發展，公唔公道呢？對自己公唔公道呢？」 莊文強
無綫真係好笑 《竊聽3》其實也是合拍片，是以香港為本位的合拍片。麥兆輝認為，近期電影再以香港為本位，將成一種趨勢：
「模仿另一種文化去拍戲，我自己就做唔到⋯⋯唯有自己嘅電影文化夠強，你先可以影響其他人。」出身無綫的莊文強續說，
今天的電視劇未能獲取觀眾的共鳴，問題是無資源、忽略創新。增發牌是否一個選擇？「佢哋（無線）成日有個講法，個Pool（市場）唔會更大，真係好笑。」
下一套戲題材更敏感 莊文強說，若果再拍一套直視香港問題電影，將會是更爆的題材，「你話套戲敏感？其實，最敏感都無拍到。」
可否透露一下？「唔講喇，留返下一套。」《竊聽》系列第三部曲的「土豪爭霸」之後，麥莊二人下一套開拍的會是奇幻片，
影迷期待兩人「再爆啲」題材揭曉，還要等一段時間。
http://thehousenews.com/society/%E9%BA%A5%E5%85%86%E8%BC%9D-%E8%8E%8A%E6%96%87%E5%BC%B7-%E6%8B%8D-%E7%AB%8A%E8%81%BD3-%E6%BA%90%E6%96%BC%E6%86%A4%E6%80%92/
