和勝和負：我不禁倒抽一口涼氣2014/07/08
我今日講呢番說話，事先冇向編輯作出諮詢，亦冇同生果波版朋友知會，呢個純粹係我嘅個人感受。熟識我嘅朋友都知道，我從來都係（一窒）從心而發，直話直說；我唔會故意為巴西講好話，我只會（再窒）講真話。
無論巴西有乜嘢發生，佢都永永遠遠係我最愛（扮流眼淚）嘅球隊。雖然，我對佢今屆嘅排陣、攻擊力有所保留，但我重申，我係會永遠支持巴西（此時編輯打電話嚟，一手撥開）。
好衷心咁呼籲傳媒朋友、網上朋友、球場朋友、球證，畀多啲空間巴西。巴西現時需要嘅，係一個寧靜環境踢波。
今晚場波純粹係巴西自己嘅家事，同社會大眾無關，希望大家唔好睇直播、再騷擾尼馬（圖），唔好再批評巴西。
對於莊家開盤偏向德國，我喺度強烈譴責（戚眉），表示極之憤慨（碌眼），同埋遺憾（眼射電光）。德國Fans涼薄、刻毒，對巴西惡意批評。恕我直言，佢哋唔單止顯露出淺薄、無知，當我知道當中仲有部份係大學講師，我失禁、倒抽一口涼氣，我為莘莘學子有一班咁嘅（手指）老師（手指）覺得擔憂。
呢番說話唔係公關技倆，唔係語言偽術。我再講一次，今日純粹係應傳媒要求出稿。「虎毒不食兒，但莊毒必食閒」，今晚買重德國小心睇路（聽晚荷蘭就更加）。
假如尼馬是你的仔女，你還會睇這篇文章嗎？
文：梁柏堅
http://worldcup2014.appledaily.com/article/all/latest/20140708/18791829
