羅力亞:咁又未至於
你同loki/wandavision比就梗係有分別
(2021-12-23 13:57) 
話佢唔得，唔係因為佢無好勁既超能力，又或者好奇幻既劇情！無錯，佢唔係LOKI WANDA，無得玩魔法、時空、多重宇宙。但佢唔係無野可以講嘛。 黑寡婦都係普通人，我哋對黑寡婦呢套戲失望，都唔係因為佢無超能力、超自然既要素。而係佢無用到已有既素材，拍出人物既精髓！ 鷹眼既情況一樣。
1. 佢個關鍵設定，係鷹眼要係聖誕節前完成「任務」！「趕」返去同屋企人過聖誕節！ 但成套劇，你有冇FEEL 到 「趕」呢個元素？完全無「趕」既感覺囉。相反係好優閒囉。好似大把時間咁。結果， 反映出黎既效果就係，連觀眾都覺得好拖，好悶。
2. 鷹眼孤身在外，不能與家人一齊過節。點睇都應該加多幾分「落撲」、「寂寞」、「孤單」等等元素落去。 然後再借女主角黎加返啲「溫暖」既感覺比佢。令佢聯想 到「家人」、「親人」既感覺。 從而建構佢兩個人既關係。 套劇係有諗過咁去的， 但鋪排唔夠，畫面亦唔夠強烈。 感覺並不突出 ！而呢樣野就更加直接影響埋下面呢點！
3、鷹眼同女主角既關係。究竟係點建立出黎的？ 女主角因為童年往事，基本上咩都唔駛講就可以解釋到佢點解咁仰慕鷹眼！呢點唔難鋪排。 畢竟對方係拯救世界既超級英雄之一。 你仲要同佢有一面之緣。 夠哂了！ 但鷹眼呢？ 鷹眼點解會對眼前呢位少女改觀？幾乎可以話係參透世情既鷹眼， 因為呢位少女做過咩而令佢由唔認同呢位少女，變成認同佢為 「拍擋」？ 唔係就係射過個一箭「救」左佢係話？ 基本上，鷹眼駛鬼佢救咩？ 女主角由岩岩結識鷹眼到結局，其實係無變過。都係個個懞懂少女。 既然都無變過，鷹眼對佢既觀感點解會突然改變？ 即係，簡單啲咁講，究竟邊件事或邊個行為或邊個場景，令到鷹眼突然對佢「括目相看」？又或者發覺原來之前一直唔了解眼前呢位少女？ 睇完都唔覺有咁既一幕。然後，兩個人就互相了解成為拍擋了⋯⋯⋯
4. 而全劇全大敗筆，就係加入其他電影既人物。本來呢招係最剎食的。 最易令觀眾受落的。事實大家既話題次次都係，呀，邊個邊個會加入呀，邊個邊個會出現呀！ 但要明白，加入呢啲人物，係因為呢啲人物係呢個故事到「有故事」可講。 唔係求求其其加個人物落去就叫好睇的。如果個人物同個故事本身係完全無關係，加落去 JUST FOR FUN，好似蜘蛛俠個位律師咁！ FINE ！OK！ 個一幕拍下手，笑下囉。反正全套戲其實都唔關佢事。 但如果個人物係要黎建構成個故事既其中一部分，咁就完全兩回事了！ 白寡婦！瑪雅！大人物（金咩咩） ⋯⋯⋯有邊個你地覺得係突出的？有邊個你地睇到佢個故事的？ 全部都係生吞活剝咁夾硬加落去。為加而加。 大人物都算了，反正一套劇點都要有個反派。唔係A 就係 B 架啦。 幾求其，幾無靈魂都叫反派哎。 咁瑪雅呢？佢係套劇到有咩作用？ 想表達啲咩？想牽引啲咩劇情出黎？ 想襯托啲咩？佢係成個故事到有咩意義？如果想話借佢黎勾起鷹眼既「 黑歷史」， 等鷹眼再次面對返呢段不堪回首既往事，從而係浪人呢個心魔到解放返出黎！咁⋯⋯⋯有冇哎？ 鷹眼除左同佢打左兩場， 講幾句野，然後就咩交著都無了。 講幾句說話就可以令一個人放下十幾年既仇恨！ 嘩，咁佢呢段黑歷史都唔係咁黑者。 講幾句就解決到既問題，有幾難呀？同埋，佢講幾句令瑪雅放下仇恨，咁佢自己呢？ 佢有從呢件事中領會到啲咩？ 得著左啲咩？ 點解可以從浪人呢段往事中走返出黎？ 無囉！ 咩都無呀！就咁用火著左件衫，個啲叫毀滅證據咋。 燒左就一了百了呀？殺左人地老頭，然後賴落去大人物到⋯⋯喂，佢通風報訊又點？你係落手個個喎！ 大人物做過咩，關你咩事者？ 點解咁樣解釋完，就可以當無件事？ 咁都得？
如果將呢段野，同寒冬戰士點樣面對自己既黑歷史，點樣從其中走返出黎！點樣面對自己既心魔！ 你就知道，鷹眼呢段，係何其失敗！
白寡婦個角色更加無里頭！無里頭到令人失笑！ 真係無戲搵戲黎做！夾硬到一個點！ 佢對鷹眼既仇恨完全係無中生有的！甚至不能理解的！ 佢寧願信一個完全唔識，仲要有黑底背景既陌生人， 無視現存在世既所有證據！無視佢家姐多年黎對自己換命之交既信任（我肯定黑寡婦有同自己個妹提到鷹眼，而且肯定有同佢講兩個關係有幾深厚。），然後無情白事就話要追殺鷹眼了！完全唔都唔係正常人既思路！ 點解唔係直接搵鷹眼問清楚？ 如果你話驚有內情，擔心鷹眼會隱瞞真相， 咁點解唔係先去查證成件事？ 應該仲有唔少同當年事件相關既人物係到哎。以佢既身份、能力，要查亦一啲都唔難喎。 但佢就係咩都唔做，第一件事就去追殺鷹眼先⋯⋯⋯何其荒謬！
更荒謬既係⋯⋯⋯原來只要鷹眼講幾句，佢又信到十足十架啦！ 咁你一早走去問清楚咪得囉。個幾場交，打黎托咩？
所以，唔係因為鷹眼無超能力，劇情無科幻元素，所以我話呢套劇唔掂。而係佢連最基本既講故事既功力都好唔掂。一大堆可有可無，同劇情推演幾乎全無關係既人物穿黎插去，咁就插左六集了⋯⋯⋯⋯然鷹眼同個少女就成為好拍擋了⋯⋯⋯WHY？！？！？
都唔講咩探索鷹眼既心路歷程呢啲咁高層次既題目了⋯⋯⋯ 係有既！到喉唔到肺個隻囉。
[ 此帖被freezefox在2021-12-23 21:30重新編輯 ]
