阿仙奴禮拜二晚喺英格蘭聯賽盃第4圈奇蹟反勝諾域治晉級，入兩粒18歲前鋒尼基迪亞同埋「撳制」換人兵工廠領隊雲格都應記一功！
主隊踢到完場前五分鐘時候仲落後一球，呢個時候雲格決定調入小將尼基迪亞。呢位阿仙奴預備組球員行入球場只係15秒，就接應左路角球同埋高基連頭槌跣後，喺遠柱快腳篤入，幫兵工廠追平1:1。咁仲未夠，去到加時上半場六分鐘，尼基迪亞再用頭槌入波，直頭做埋贏波英雄，認真唔簡單。
阿仙奴領隊雲格賽後話好意外，從來未見過一位年青球員可以咁樣喺一場比賽入面起到即時作用：「我知道佢能力，但喺球隊需要你時候又交到貨，呢種質素同能力，喺落場比賽前係無人會知道㗎！兩個入波當中我更加鍾意球頭槌，因為尼基迪亞唔係一個好高球員。呢球波證明咗佢幾咁希望入波。」
