有片丨《給十九歲的我》導演張婉婷致歉 訪李慧詩 澄清事前曾與相關人員溝通表明身份 稱曾與阿聆溝通修改意見 阿佘曾表示「硬食」
✨請到留言撳link睇片
#張婉婷 執導 #紀錄片《#給十九歲的我》明日（6日）暫停公開放映，紀錄片自去年8月上映優先場以來，不少輿論質疑片中「紀錄片倫理」問題。片中其中兩位 #英華女學校 學生阿聆及阿佘分別以長文及接受《明周》訪問，阿聆表明由始至終不同意公開放映，首次看完影片後情緒受困。她指一直以為所指「放映」是校內放映、或發行DVD籌款，半年至數月前才獲知校方和導演有公映的打算，「我不停自問他們為何能高舉如此高尚的理念，但背後卻如此不尊重學生意願。」
阿佘接受《明周》訪問時，表示不滿未能在電影送檢前先看最終剪接版本，以致過檢後無法作任何刪改；包括她在學校附近吸煙一幕被拍下：「你想拍我吸煙，有好多機會拍，不需要這樣偷偷地在對面街zoom-in來影我。」她亦表明不同意導演以「反叛」解釋學生想退出原因，稱兩者不能相提並論。
【前校長發公開信致歉：我責無旁貸】
阿聆指出，21年底校方曾草擬新一份同意書，需要拍攝對象親手簽署；惟翌年6月，校方卻表示學生家長2012年簽署的同意書，已賦予攝製團隊公開放映的權利，包括香港境外。阿聆表示與其他被拍攝的同學一直理解這只是一則「通告」。阿佘說：「其實阿聆即使沒有簽那份文件（新的同意書），這部戲終於還是上映了，如我當初估計一樣，所以最後我做過一大輪掙扎之後，跟那些大人雞同鴨講完，我便認為算了，我簽吧，純粹是改變不到別人就惟有改變自己，抱這樣的一個態度。」
紀錄片發起人、前校長石玉如昨日回覆《明周》表示，退休前「完全沒有收到投訴，關於如何拍攝或不高興」，關於拍攝手法的不滿只是近日才聽到，稱會馬上著手處理。今日石玉如再向英華舊生會發公開信致歉：「面對挑戰和爭議，我責無旁貸。紀錄片中呈現的每一個生命，我都十分重視，其中有我所珍愛的學生。為了當初這個意念而引起學生和學校種種的困難，我深感抱歉。」
【主動提出暫停公映】
張婉婷今日出席《給十九歲的我》謝票，並宣佈本片明日起暫停公映。謝票後張婉婷接受訪問，表示暫未與阿聆與阿佘溝通，主要是與校方討論是否終止放映。張表示是她提出暫停公映，「但一定要經校方，因為校方先係最有決定（權）嗰個，但佢哋都覺得應該係咁，釐清所有嘢，睇下發生乜嘢事。因為時光飛逝，佢哋以為阿聆冇乜嘢，因為中間有一排，就連佢爸爸都話佢已經平伏咗。」
阿聆在文中表示，一直以為同意書只是通告而非法律文件，張婉婷卻說：「佢哋簽嗰份consent（同意書）寫中文，表示同意以後，總之任何場合、公共放映空間，做唔同format。」問到學生及家長簽署時，是否清楚了解同意書內容，張稱不大了解，「因為唔係我簽，所以我話要停低釐清一下佢哋（校方）解釋咗幾多，但嗰份consent有寫明係戲院。」至於「#牛下女車神」#李慧詩 炮轟張婉婷未經她同意下將訪問片段收錄在電影中，張指：「當時我同單車會名譽董事溝通，佢知道我哋係學校嚟，我一定要報上我哋係學校嚟拍紀錄片，拍馬燕茹，如果可以都想訪問李慧詩，想問佢覺得青少年喺呢個階段係一個點樣既狀態，學業同運動佢以前點樣balance。」
【稱阿佘曾表示「硬食」 阿聆一直未回覆】
張表示，21年12月，電影首次校內放映，之後校方邀請所有參與拍攝學生出席問意見，「我哋係面對面，全組人研討，問佢哋點樣睇。講完之後我返去處理。由2021年12月到2022年8月國際電影節，部戲中間一直冇放映，係俾佢哋溝通、了解，講自己意見。」阿佘表示未能在電影送檢前先看最終剪接版本，以致過檢後無法作任何刪改。張卻稱：「送咗檢如果改少少係冇問題，阿佘又冇乜嘢要改，佢好簡單，佢話唯一係有一度用國語講，改番做廣東話。佢話：『冇喇！其餘嗰啲我硬食啦！』佢講嘢成日都係咁，『都係唔係好好㗎喇，不過我都硬食咗佢啦。』
「阿聆我就唔知，我有問佢，但佢冇講。如果真係要改得多，都要再送檢，（再送檢沒問題？）係好煩，咁一定得啦，如果佢真係要（改），但佢冇睬我。我同學校講，阿聆冇答，咁點呢？等下等下，佢哋又傾下傾下（指聆與校方），時光就咁樣過去，學校話由得佢，『佢都冇話要改邊度，咁就由佢先。』」她認為雙方「溝通存誤差」，「我哋真係要了解，同佢坐低傾下先，究竟點解咁大反應。」又指：「如果要cut，咁就再送檢。我哋有問過佢有冇乜嘢抗拒，我寫咗個表畀佢，問佢有啲乜嘢係唔舒服…但佢冇覆過我。我同佢講要做㗎喇，如果唔係趕唔切，當時已經送咗檢。」
【偷拍食煙違拍攝道德 張婉婷：有啲底線我哋唔會超越】
阿佘在訪問中，批評攝影師偷拍她在校外食煙，如「狗仔隊」跟蹤偷拍，張婉婷稱當日是英華新校舍落成儀式，她當時不知道攝影師拍下這一幕，事後阿佘曾反映被拍，張婉婷稱她理解是「阿佘擔心會影響學校」：「我話冇人認得到呢度係學校喎，唔會影響到學校，咁佢就話：『咁好啦，咁如果冇人覺得呢度係學校門口…』我就覺得呢個討論完咗。」她指這個鏡頭可以剪去，「佢自己都好似話，如果真係傾起上嚟都可以唔使cut…如果係太抗拒，都係可以做（剪）。
「關於紀錄片既私隱問題，成日都有拗撬。紀錄片有啲嘢係一定要拍，但有啲底線我哋唔會超越。第一，唔可以挖人私隱，佢唔講畀你聽，你唔可以挖佢唔想畀我哋睇到既私隱，唔可以整個camera跟住佢，唔可以偷拍。第二係，佢可以隨時終止拍攝。我哋中間都走咗好多，最初五十幾個，揀咗三十幾個，最終得番十二個。你隨時可以終止拍攝、唔講嘢，或者走人。隨時都可以終止，成日都發生。」
【中五女生拒電影公映退出拍攝】
阿聆在文中提到有女生由中一哭到中五，始獲准退出拍攝，張婉婷稱：「冇一個女仔由中一喊到中五，中一亦冇人唔願意（拍攝），大家都覺得好玩，但中三就個個都唔願意。」她指拍攝期間，有日她向學生宣佈稱有發行公司看中這部戲，有機會於戲院公映：「其中一個女仔，即係話中五離開嗰個女仔，佢話：『我唔要喺戲院俾人睇到』，當日阿聆在場，阿聆話：『我哋都簽咗個consent（2012年）啦』我既理解係，佢（阿聆）唔會走，佢仲勸嗰個女仔唔好走，但嗰個女仔堅決要走。阿聆…我以為佢勸得人，即係佢唔會走。」
阿聆在長文中表明一直與校方反映，甚至要求與校董會對話，反對電影公映，張婉婷則說，校方一直跟學生「溝通」，「問佢哋有乜嘢係唔可以面對。」形容由去年優先場放映開始，「學校都好謹慎，睇下呢套戲出嚟會唔會有啲咩評論、對學校、學生有乜嘢影響，一路以嚟評論都係好好。一路直到呢幾日…之前全部冇，所以學校好放心，應該都係可以公映。但一話公映，『全部嘢就出嚟』。」
之後張婉婷在另一場謝票後，舉行記者會公開回應，並向所有《給十九歲的我》的台前幕後人員致歉，其間一度哽咽：「身為導演，我覺得我係責無旁貸，如果裏面有啲乜嘢誤解、或者做得唔好，我都係應該負上責任。」、「同幫咗我哋十年既所有既團隊、工作人員、學生，我哋所有主角，或者所有幫過我哋做transcript大工程既舊生，同埋樂隊、音樂人、音樂老師，對你哋唔住，我希望用一個時間，睇下可唔可以溝通番之後，或者仲有一線曙光，唔好意思。」記者會上張亦提及李慧詩炮轟一事，重申拍攝前有相關人員協助處理，攝製隊亦有表達是拍攝紀錄片，稱可能李慧詩誤以為是新聞組，形容當中可能存在「甩漏」。
#娛壹
[ 此帖被羅力亞在2023-02-06 07:54重新編輯 ]
