後防不隱，好大程度上係同球員集中力有關係。 係贏得冠軍後，崩緊左足足兩年既精神力，會鬆懈落黎。其實係可以理解的。我對我地既防守力仍然有一定信心。 係要少少時間重拾狀態。 但應該唔會一下子跌WATT 跌到慘不忍睹。 AA 係最明顯未有態個個，但我相信比多一兩場佢，佢可以逐步提升的。可惜下場就要對車仔，調整時間不足。有心理預備要失分。但之後直到第八周對曼城之前，我地都仲有時間調整的。 至少，羅拔臣保持到上佳狀態！VVD 既大意波，唔會場場出現既。 呢場衰左，下次會學乖。 高美斯係我最擔心個個。熱身賽時明顯狀態不足，集中力不夠。今場上半場都有呢個毛病。但下半場見佢都愈打愈好，好事黎既。 同法賓奴一樣，季初未入局，比啲時間，我相信佢地會愈打愈好。
真正令人擔心既反而係入到四球波既中前場。的確，我地火力係無減弱到，次次都圍住黎打，壓住黎打。但把握力真係好一般。要大量既機會先造就到入球。失機既數字同入球既數字成正比。呢樣真係唔多掂。唔係隊隊都會比咁多機會你攻的。 把握力不足真係會死人的。 有時一場波，個一兩次反擊機會就係全局既轉捩點，入到入唔到就係個關鍵。 列斯聯射你三球就入三球，呢啲咪把握力囉。 沙拿原本驚佢無態，但第一場睇落又唔錯。反而文尼就真係令人失望。但最最最令人擔心個個係法明奴。已經唔係無私唔無私既問題。亦唔係角色既問題。 而係一個攻擊球員，入到去個個位，大大舊叉燒係到，食唔到就係最大既問題。感覺法明奴係信心不足。其實佢上季入球數字都真係少得好緊要，呢個已經係一個警號。 南野本來應該係就解決呢個問題既答案。但唔好話正選，連後備入替都無⋯⋯頻頻失機，表現唔合格既法明奴就打足全場。 咁點攪呀？ 唔係要法明奴打後備，而係，當你發覺原有攻擊陣式有問題時，係咪都應該調整下呢？加多個南野落去，同時激活前線三人，唔係我地一直部署緊既PLAN B 咩？如果早早入多球，拉開個比數去到 4:2 ，邊駛打到最後靠個 12碼黎食糊？
另外，基達都仲係未得。 佢既問題係，太容易失去球權了。 下下傳送都係高風險個種，好幾次比人截擊得手。 咁唔掂架喎。如果呢個係沙基利不受重用既原因，咁基達好快步沙基利後塵⋯⋯
最後，鐘斯真心係日後中場既大將之材。 好好栽培佢吧！
[ 此帖被freezefox在2020-09-13 12:36重新編輯 ]
