曼聯主場大戰阿仙奴，Rashford以2入球1助攻帶領曼聯擊敗阿仙奴
引用Now直播旁述丘健威一句說話：幾耐無見過Rashford喺球場上笑？
只要大家有喺Youtube睇開理性分析，就知道我對近幾季Rashford既評價係點：媽聲四起。我或者球迷會覺得Rashford無用腦踢波，球商偏低，耷低頭死去人堆，係都要左邊去大位射波等等...呢近季真係重重複複咁鬧咗好多次。
唔好誤會，呢篇文唔係突然轉風向話Rashford表現神級；反之即使坦克近幾場將Rashford放到正中鋒位，但其實表現唔算好好，甚至以正前鋒嚟講算係差。雖然Rashford出道為正前鋒，但佢打左翼已經好多年，已經Pick up唔番前鋒既工作。上場對修咸頓背對龍門二傳唔係唔夠力就係俾得太痴腳，隊友完全接應唔到，爭頂又唔夠頂，身位又唔夠中堅撞，出嚟拎波轉到身又係向前推去人堆，令曼聯不斷喺前場失控球權，組織唔到有效攻勢。
今場對阿仙奴其實都有類似問題，不過，竟然係「態度」搭救。
前幾季除咗插佢技術意識不足外，最重要係「態度」出現問題。同整隊曼聯一樣，唔追波、唔回防、無支援、一現位一定係拉出嚟要波然後自己推死位失控球、失控球又唔追番，無限輪迴。
而喺今季開季兩連敗後，真係知恥近乎勇。即使Rashford打前鋒有上述問題，但佢唔放棄不斷走動、迫搶既態度先係球迷所樂見。只講今場對阿仙奴，面對後防長傳到前場，Rashford即使明知唔夠對方中堅頂，但佢都會跑到落點俾壓力，起碼令對方頂得唔舒服，喺最前經常現位做配合，第一球就係佢喺前鋒位做連接轉俾Anthoy射入。特別攻守轉換尤其明顯：攻轉守會反搶、守轉攻反擊向前跑呢項殺手鐧終於都番嚟(講真嗰球單刀真係驚佢唔入，唔係未試過)，到最後跑到膕繩肌硬晒被換走...贏盡掌聲
當一個球員喺場上態度消極，佢根本無心去進步，無心去諗點樣做好啲，只會愈踢愈沉；反之態度積極，不斷去反思球場上每一個決定，一定會愈踢愈好。呢啲都係作為職業球員對自己既交待，而今場結果就係Rashford既回報，希望佢真係可以走出困局。
原來球迷要求好簡單，屎波唔緊要，「態度」最重要。
#理性分析 #曼聯 #阿仙奴 #英超 #福仔 #Rashford
[ 此帖被羅力亞在2022-09-05 08:24重新編輯 ]
