<雲格style x 兵工廠之變>

每當和朋友談起阿仙奴，腦海中就會很自然地浮現出兩個畫面：一個是球隊進攻時不停地把皮球傳來傳去，無從入手；另一個畫面是一位滿頭白髮，臉上皺紋愈來愈多的領隊雲格。

作為球會歷史上執教時間最長的領隊，甚至是最出色的一位，雲格的功績和地位，當然值得表揚和尊重。

＜雲格style>
他發掘年青球員的潛能眼光獨到，點石成金，低買高賣的例子比比皆是；他的球隊在英超踢法別樹一格，成功為聯賽注入一番新景象，更是英超成立至今唯一一隊以全季不敗紀錄奪冠的球隊。

但是，自從05年的足總盃冠軍後，球隊已經7年未嘗奪冠滋味。細心發現，球隊近幾年的球員買賣策略和成績幾乎是千篇一律。

球員買賣：
季初通常高價賣走主力，賺了一筆，跟著在轉會市場上先向法甲或法國球員埋手，然後又不肯大破慳囊，（或許是需要償還興建酋長球場費用）屢屢因轉會費或薪水上限問題而簽不到球迷所想或球隊所需的球員。而最後所簽下的球員大致可分為兩類：一是年輕，有待磨練；二是經驗豐富，價錢不高。

成績：
開季後高開低走，季中接連在各條戰線下馬，然後又跟陣中主力在續約問題上出現分歧，促使主力漸萌去意。到季末，球隊慣性地拿下聯賽第三或第四名，取得歐聯參賽資格，其後有主力宣布離隊他投。

自滿？
球迷可能會覺得以上種種事例不是都會發生在每隊爭標不成的球隊身上嗎？沒錯，如果作為一隊爭標黑馬，年復年都可保持以上的成績，已經算是超額完成。但作為3屆英超盟主的阿仙奴（與車路士一樣，同是英超自92年成立以來，奪冠次數第二多的球隊）始終需要獎杯來回饋球迷的支持。更重要的是，作為傳統四強的一份子，每年取得歐洲賽資格是「最低消費」，球隊絕不能以這樣「高不成，低不就」的成績而自滿。

＜變＞
事過境遷，眼見球隊不斷流失陣中主力，由昔日的兵工廠變成對手的「兵工廠」，年年無力爭冠，不少球迷已經覺得領隊是時候退下來，讓球隊注入一些新元素，帶來新衝擊。

「變」已經迫在眉睫。因為各位兵工廠球迷都知道如果不「變」，結果只會是無了期的等待，七年之癢，難道還不夠嗎？

怎樣變
由誰去改變？改變的過程是怎樣？改變的程度有多大？這些都是球隊將來面對的問題。
但理性一點，所謂遠水𣎴能救近火，以目前情況來看，更換領隊的可能性不大，假設球隊在冬季轉會市場重開後不增添新球員，以現有人腳完成下半季3條戰線。

建議陣式 4-4-2

                     普度斯基       禾確特

辛迪卡蘇拿     韋舒亞       阿迪達    張柏倫

傑比斯         華美倫         梅迪蕯卡   贊堅臣

                            施捷斯尼

雖然4-3-3 才是主打陣式，加上球員經過多年磨合，逐漸成形，而近期禾確特改踢中鋒位置亦初見成效，理應毋須改變踢法。但本文屬意提出改變，此陣式可供參考之用。

解說
這陣式是按照常規正選加以編排新位置，中前場球員企位可以於433跟442之間互換，令對手防不勝防。

前鋒
考慮到普度斯基和禾確特分別在本季英超暫已取得入球和助攻各6次和8次
改踢雙箭頭屬意把兩人位置更靠近球門，利用速度和走位配合來增加埋門機會，如兩人能夠擦出火花，定必相得益彰。

中場
中場變化不大，只是把張柏倫和辛迪卡蘇拿出任兩翼，更多利用邊線進攻，改善以往集中在中路推進時「老鼠拉龜」的情況。注意，由於普度斯基和禾確特皆非高大中鋒，缺乏制空能力，所以兩翼傳中時應減少高空波。此外，辛迪卡蘇拿、韋舒亞和阿迪達可以在比賽中互換位置，令陣式更見靈活。

後防及門將
華美倫仍是後防重心，其拍擋屬哥斯爾尼與梅迪蕯卡之爭，考慮到本季聯賽裡當有梅迪蕯卡在陣下，球隊不失球場次多達7場，因此選擇德國中堅。而本季表現出色的贊堅臣理應佔有一席。傑比斯及施捷斯尼的入選則因競爭者表現欠佳而自動當選。

無人能及
雲格代表著阿仙奴，沒有人比他更熟悉球隊的一切。已經63歲的教授，並沒有被時下球圈裡急功近利的歪風所影響。他繼續重用年青球員，不隨波逐流地重金禮聘世界級球星，絕對是現今球壇的「清泉」。

他領軍16載，除了得到管理層的信任外，他那份堅持自己信念的態度，實在值得後世所讚頌和學習。

姑勿論將來的繼任人是誰，最重要是到時候的阿仙奴，仍然是我們腦海中的那隊「阿仙奴」嗎？

「沒有雲格的日子，阿仙奴會變成怎樣？」我沒有想過，你們呢？

最佳法國10人
以下是雲格帶隊以來，10位表現優異的法國兵。（註：入圍球員純粹個人意見。另外，因少有著名法國籍門將替球隊效力，故沒有挑選門將）

                 亨利       安歷卡

皮里斯       韋拉       比堤       拿斯尼

基歷治      加拿斯  哥斯爾尼   沙格拿

icemanbergkamp	2013-01-18 01:00
「沒有雲格的日子，阿仙奴會變成怎樣？」沒有雲加的阿仙奴??? 咪又係阿仙奴.... 阿仙奴球會百幾年歷史, 雲加只係其中一位領隊, 佢未黎之前阿仙奴一樣贏過聯賽冠軍.....

啪啪啪啪啪啪	2013-01-18 01:09
唔覺得高斯爾尼同基歷治值得入

icemanbergkamp

2013-01-18 01:23

另外樓主提議既442本身係冇錯, 不過人腳實在不敢苟同....

無論最近arteta 既受傷, 抑或今季面對強隊, 以至上月面對swansea既主場大敗, 明顯用arteta打防中當面對強隊係幾咁勉強, 就算多左jack, 始終2人都唔係純防中 (jack出腳狠辣不等於佢適合防守工作), 體格亦不適合經常要硬碰既搶截工作.....

相對上尋晚既coquelin + diaby 組合就似樣得多, 再視對手中場強度用arteta搭2者其1會更合理....

而前線棄giroud 亦等於防棄高空轟炸, 減少進攻範數......

siuyeung8693	2013-01-18 08:08
多謝閣下寶貴意見。由於阿仙奴最強始終係地面推進，加上基奧特還未融入球隊進攻體系，埋門把握能有待提升，所以才把他放在後備席。另外，迪亞比可以在正選上佔一席位，但考慮到剛剛傷愈，所以該陣容未有他的蹤影。

bbq903

2013-01-18 09:56

icemanbergkamp:另外樓主提議既442本身係冇錯, 不過人腳實在不敢苟同....
無論最近arteta 既受傷, 抑或今季面對強隊, 以至上月面對swansea既主場大敗, 明顯用arteta打防中當面對強隊係幾咁勉強, 就算多左jack, 始終2人都唔係純防中 (jack出腳狠辣不等於佢適合防守工作), 體格亦不適合經常要硬碰 .. (2013-01-18 01:23)

絕對同意 ! coquelin + diaby 暫時應該防中較穩健組合 . 今年arteta 係阿記陣中明顯冇比往年重要 , 但控制節制方面仍然係陣中最強的一員. 對手如果唔係太強先考慮用 coquelin/ diaby + arteta 應該好好多.

jack 反而應該參與更多進攻, 最能夠解決阿記係中前場傳來傳去應該就係佢. 夠膽色作中路突破, 入唔到都博到對方犯規. 真係超正.

迪克	2013-01-18 11:33
bbq903:絕對同意 ! coquelin + diaby 暫時應該防中較穩健組合 . 今年arteta 係阿記陣中明顯冇比往年重要 , 但控制節制方面仍然係陣中最強的一員. 對手如果唔係太強先考慮用 coquelin/ diaby + arteta 應該好好多. jack 反而應該參與更多進攻, 最 .. (2013-01-18 09:56) diaby都可以/甚愛自己持球突破

迪克	2013-01-18 11:40
啪啪啪啪啪啪:唔覺得高斯爾尼同基歷治值得入 (2013-01-18 01:09) 純粹講法國人~

stevewong_20	2013-01-18 12:21

bbq903	2013-01-18 12:29
迪克:diaby都可以/甚愛自己持球突破 (2013-01-18 11:33) 佢真係好有韋拉feel , 如果佢好似vps 咁, 好返後成季都唔傷你話幾好呢

Gabriel	2013-01-18 16:52
bbq903:佢真係好有韋拉feel , 如果佢好似vps 咁, 好返後成季都唔傷你話幾好呢 [表情] (2013-01-18 12:29) Diaby其實真係幾有Potential 不過又係玻玻地璃

啪啪啪啪啪啪	2013-01-20 00:07
迪克: 純粹講法國人~ 最佳法國10人咁多年黎得咁少法國人 ?

啪啪啪啪啪啪	2013-01-20 00:08
個人覺得韋托特好過拿斯尼既鋒既翼

迪克	2013-01-20 00:35
啪啪啪啪啪啪:最佳法國10人咁多年黎得咁少法國人 ? (2013-01-20 00:07) 都要對返位o架嘛~ clichy左閘位 o黎講，應該無人同佢爭中堅..已經揀左gallas,唔通揀史波拉斯咩

炸炸帝	2013-01-20 00:55
一個迷雲黨而已

siuyeung8693	2013-01-20 09:20
To: 炸炸帝, 本人並非你所謂的迷雲黨。我只是以中立者身份表達對球隊的看法。

nealtsang	2013-01-21 23:57
He is a good CEO, rather than a good coach

icemanbergkamp

2013-01-22 20:33

迪克:
都要對返位o架嘛~
clichy左閘位 o黎講，應該無人同佢爭
.......

要講呢個陣, 左閘我寧願擺flamini, 另外同意波叔 wiltord > nasri, 諗到既法國兵仲有.....

CB有 silvestre, cygan, 後者都算好過屎gay既......
多功能可以踢中後場既 grimandi 同 FW aliadiere (對佢最大印象係踢米堡倒戈上身入阿記波.....)

再加現役既diaby, giroud, coquelin, 人係有, 不過配得上"最佳"稱號既的確係得中前場果幾位, 其餘只係湊數.....

啪啪啪啪啪啪	2013-01-23 00:40
法國前場大把可以入選拿斯尼既影響力真係比起上黎差好遠至於後衛，一向阿仙奴都無咩好既法國後衛人選連沙格拿同基治都入到「最佳」真係得淡笑齊人岩位置唔等於最佳

freezefox	2013-01-25 10:27
文章屬於轉載，請注明出處！否則我地可能會考慮鎖文。

siuyeung8693	2013-02-27 11:59
freezefox:文章屬於轉載，請注明出處！否則我地可能會考慮鎖文。 (2013-01-25 10:27) this article was written by me

查看完整版本: [-- <雲格style x 兵工廠之變> --] [-- top --]

Powered by phpwind v8.7 Code ©2003-2011 phpwind
Time 0.085129 second(s),query:3 Gzip disabled