上月不幸車禍離世嘅陳僖儀（Sita），家人定喺星期五（10號）為佢喺大圍寶福紀念館設靈，翌日出殯。Sita 家人知道有唔少 fans 同市民都想向 Sita 送別，所以安排咗設靈當日下午 5 點至 6 點半，可以畀公眾人士入內鞠躬，送 Sita 最後一程。
另外 Sita 有三首生前未推出嘅新歌，其中一首係國語情歌《愛的劇本》，原來呢首歌喺佢未入行前已唱過 demo，最終可以由佢主唱，Sita 表現得好開心。而 Sita 亦已經為呢首歌拍咗 MV，當日喺石澳取景，不過就落住微雨，之後 Sita 再同工作人員拉隊到牛棚嘅玻璃工作室繼續拍攝，雖然要一日走兩個地方，但 Sita 當日依然好落力投入演出。
太陽娛樂文化將會為Sita推出最後一張唱片《All The Best…》，碟入面收錄晒已推出嘅《Crazy Love》同埋《Let Me Find Love》所有歌，另外又有未出過嘅新歌同埋 demo，仲有啲 Sita 以往喺音樂會嘅演出同MV。除 DVD 同 CD 外，碟裏面亦有包含相集，家人、同事、朋友同埋歌手送畀 Sita 嘅文字亦一一收錄喺入面，唱片公司希望可以趕到設靈當日推出，紀念碟嘅全數收益會捐畀 Sita 家屬。
