查看完整版本: [-- 第87屆奧斯卡得獎名單 --]

【好友論壇】- 以足球會好友 -> 【劇集影評】 -> 第87屆奧斯卡得獎名單 [打印本頁] 登錄 -> 注冊 -> 回復主題 -> 發表主題

羅力亞 2015-02-23 22:20

第87屆奧斯卡得獎名單




最佳電影
《飛鳥俠》（Birdman）

最佳導演
艾力謝路依拿力圖（Alejandro Inarritu）《飛鳥俠》

最佳男主角
艾迪烈柏尼（Eddie Redmayne）《霍金：愛的方程式》

最佳女主角
茱莉安摩亞（Julianne Moore）《永遠的愛麗絲》（Still Alice）

最佳男配角
J.K.西蒙斯（J.K. Simmons）《鼓動真我》

最佳女配角
柏翠茜亞雅奇（Patricia Arquette）《我們都是這樣長大的》

最佳攝影
Emmanuel Lubezki《飛鳥俠》

最佳動畫
《大英雄聯盟》（Big Hero 6）

最佳外語片
《Ida》（波蘭）

最佳原著劇本
艾力謝路依拿力圖/ Nicolas Giacobone / Alexander Dinelaris《飛鳥俠》

最佳改編劇本
Graham Moore《解碼遊戲》

最佳美術
Adam Stockhausen/ Anna Pinnock《布達佩斯大酒店》

最佳服裝設計
Milena Canonero《布達佩斯大酒店》

最佳剪接
Tom Cross《鼓動真我》

最佳化妝及髮型
Frances Hannon/ Mark Coulier《布達佩斯大酒店》

最佳原創音樂
Alexandre Desplat《布達佩斯大酒店》

最佳電影歌曲
John Legend/ Common《Glory》《馬丁路德金－夢想之路》

最佳音效剪接
Alan Robert Murray/ Bub Asman《美國狙擊手》

最佳音響效果
Craig Mann/ Ben Wilkins/ Thomas Curley《鼓動真我》

最佳視覺效果
Paul Franklin/ Andrew Lockley/ Ian Hunter/ Scott Fisher《星際啟示錄》（Interstellar）

最佳動畫短片
Patrick Osborne/ Kristina Reed《Feast》

最佳短片
Mat Kirkby/ James Lucas《The Phone Call》

最佳紀錄片
Laura Poitras/ Mathilde Bonnefoy/ Dirk Wilutzky《CitizenFour》

最佳紀錄短片
Ellen Goosenberg Kent/ Dana Perry《Crisis Hotline：Veterans Press 1》

http://hk.apple.nextmedia.com/enews/realtime/20150223/53464140

羅力亞 2015-02-23 22:22
冇人開post討論
難得今年多好戲，出年希望出提名就記得開post

羅力亞 2015-02-23 22:24


【《馬丁路德金》奪奧斯卡最佳歌曲　致謝辭：連繫為民主抗爭的香港人】
http://bit.ly/1weGG5F

羅力亞 2015-02-23 22:26


每一年，奧斯卡都會向那年逝世的電影人致敬。今年，當中有港人非常熟悉的面孔……永遠懷念，Robin Williams。

完整奧斯卡致敬片段：
http://on.fb.me/1w0Yrj5

羅力亞 2015-02-23 22:28
《大英雄聯盟》贏最佳動畫



第87屆奧斯卡公佈提名名單，最佳動畫提名有《大英雄聯盟》（Big Hero 6）、《馴龍記2》（How to Train Your Dragon2）、《怪誕小箱俠》（The Boxtrolls）、《Song of the Sea》及《輝耀姬物語》，結果由迪士尼出品《大英雄聯盟》（Big Hero 6）成功贏得殊榮，打敗日本動畫大師高畑勳以水墨畫炮製、改編古典文學《竹取物語》嘅吉卜力動畫《輝耀姬物語》，令日本未能繼03年宮崎駿嘅《千與千尋》後再揚威奧斯卡。

至於《大英雄聯盟》導演Don Hall同拍檔Chris Williams、Roy Conli上台接受獎項，佢哋從大隻男星狄維莊遜（Dwayne Johnson）手上接受殊榮後，有多謝迪士尼及彼思（Pixar）創作主腦尊賴斯達（John Lasseter），失望而回嘅高畑勳同吉卜力工作室拍檔西村義明都有喺台下戥人高興。

http://hk.apple.nextmedia.com/enews/realtime/20150223/53463734

羅力亞 2015-02-23 22:30
《美國狙擊手》失落大獎 奇連、谷巴搞笑捧LEGO小金人



第87屆奧斯卡曲終人散，《美國狙擊手》最終都失落兩個大獎，包括「最佳電影」及「最佳男主角」，只奪得一個技術獎「最佳音效剪接」。導演奇連伊士活(Clint Eastwood)同男主角畢列谷巴(Bradley Cooper)都難免會失望。

而今日奧斯卡有個環節就有一段冇入圍嘅《LEGO英雄傳》載歌載舞表演，仲整咗好多LEGO小金人，舞蹈員拎住呢隻小金人跳舞十分搞笑，而失落大獎嘅《美國狙擊手》導演奇連伊士活同埋男主角畢列谷巴，以及梅麗史翠普今日就拎住個LEGO砌成嘅小金人合照，十分搞笑，雖然失獎，但都不失幽默。

http://hk.apple.nextmedia.com/enews/realtime/20150223/53466111

羅力亞 2015-02-23 23:09
今年有入圍既戲我都算睇得多，因為d戲碼係近幾年最吸引
以下俾少少感想，不過從來睇戲好主觀，我覺得好唔代表人地有相同諗法
大家當參考啦。或多或少有d劇透ga，當開心share啦



解碼遊戲 The Imitation Game

今年其中一套最愛的戲，"福爾摩斯"成功演活電腦之父圖靈，講述他於二戰其間破解德軍密碼、協助盟軍提早結束戰爭。
故事簡單但緊張刺激，可惜圖靈生不逢時，最後竟因性取向而抵受不住世俗眼光自殺，拯救了萬民的一代天才落得如斯收場，十分悲慘。




美國狙擊手 The American Sniper

典型大美國主義，但奇連伊士活巧妙利用這個真人故事拍出這套令人深思的戲，加上近期全世界活在IS恐怖襲擊陰霾下，究竟對付惡勢力是否只可以暴易暴？
戰場上面對被訓練成冷血童軍的小孩，生死一刻是否應狠下殺手？值得思考。




飛鳥俠 Birdman

全球戲迷一致好評，一take過的鏡頭、超現實主義下天馬行空的劇情、描寫舞台幕前幕後的光怪綠離、影評家的影響力。
找到第一代蝙蝠俠飾演烏人可謂神來之筆，令人反思近年大行其道的英雄片熱潮。一個曾經風光但過氣失意的明星、婚姻失敗的中年漢、和女兒關係極差的父親，
一個被劇評家狠批的舞台劇外行人，為了證明自己不惜自編自導自演，Michael Keaton成功將一個充滿矛盾和掙扎、內心極度複雜的角色演得出色。
最佳電影實至名歸，另外頗欣賞Edward Norton的抵死演出，可惜失落男配角一獎。




霍金:愛的方程式 The Theory of Everything

改編自霍金前妻的自傳，講述與天才科學家霍金相遇、邂逅、結婚以至最後因了解而分開，劇情比較平鋪直敍，但有男女主角搭夠。
Eddie Redmayne演出患有漸凍症的霍金極度神似，雖然坐上輪椅、有口亦難言，但賺人熱淚的內心戲令人擊節讚賞，最佳男主角捨Eddie Redmayne其誰！
女主角Felicity Jones戲中演出自然，人前經常表現出淡然自若，實質有苦自己知，雖然深愛霍金但要照顧行動不便的丈夫和年幼孩子，
更要幫補家計，壓力之大不足為外人道也，及後遇上善解人意的牧師，想愛卻不能愛，內心既痛苦又掙扎，Felicity Jones把角色揣摩得恰到好處，值得一讚。




失蹤罪 Gone Girl

知名兒童故事女作家離奇失蹤，警方遍尋不獲，丈夫一步步跌入妻子精密設計的圈套， 竟被列為疑兇。
故事不單諷刺社會容易受傳媒影響、煽動，更加曝露出一段看似牢不可破的情侶關係其實可以脆弱不堪。結局的情節更加像控訴不完美的婚姻制度。
Ben Affleck戲屎就出哂名，但演繹廢廢地的出軌老公，卻十分有說服力。
Rosamund Pike飾演為了報復丈夫不惜以性命設局的女作家，其心計及冷靜自若的神色令人心寒，印象深刻，若非對手太強，絕對有機會憑此角色封后。
滿以為幸福的家庭，實則暗藏殺機;滿以為甜蜜恩愛的模範夫妻，實則同床異夢，希望大家看罷後不會對婚姻產生恐懼。




布達佩斯大酒店 The Grand Budapest Hotel

一路坐飛機一路睇，自己狀態一般，不過特效同服裝的確十分有心思，故事有d黑色幽默，一套比較怪誕但觀賞度甚高的戲。






鼓動真我Whiplash、永遠的愛麗斯 Still Alice

未睇，但一套備受好評、另一套女主角Julianne Moore大熱封后，值得期待吧~




頭條殺機Nightcrawler

一樣未睇，但同學推介話幾正

麻凡 2015-02-24 16:48
羅力亞:
今年有入圍既戲我都算睇得多，因為d戲碼係近幾年最吸引[表情]
以下俾少少感想，不過從來睇戲好主觀，我覺得好唔代表人地有相同諗法[表情]
大家當參考啦。或多或少有d劇透ga，當開心share啦[表情]
.......

完左先至討論........
原來你都咁喜歡睇戲, 下年早D開TOPIC一齊吹啦~~~~

你睇左果D我都睇哂, 大致上觀感都同你差不多, 今年真係男演員大爆發, 好多個都係影帝級演譯, 偏偏撞埋係同一年競逐, 可惜。
我個人最喜歡係BIRDMAN, 成套戲由頭爽到尾, 大部分演員都上身, 大量長鏡頭一TAKE過, 難度極高, 仲要有好多戲中戲, 對白又蹺口, 但大家舉手頭足都極自然, 配合度高, 各演員唔係投入到角色到一定境界都做唔到, 尤其Michael Keaton 基本上係張自己屈左咁多年的感受一次過爆哂出黎, 真係連毛孔都有氣/戲, 佢做得爽, 我地又睇得爽~~~~

至於霍金, 套戲我本人覺得係麻麻地, 完全係男主角一個救全家, 可能係咁既原因令佢更突出, 攞埋影帝。

布達佩斯飯店好睇, 屬怪雞戲, 唔係人人受, 亦唔會係電影頒獎禮杯茶, 但美術真係做得好好, 好仔細, 無論人物造型同飯店由盛到衰的細節位都一絲不荀, 顏色亦有不少考究, 攞奬絕對值。

Nightcrawler 亦都好睇, 套戲相當暗黑, 陰暗的題材, 陰暗的人性, 陰暗的主角......Jake Gyllenhaal 我覺得佢做得好好, 果一雙邪氣的眼神, 油淋淋的頭髮, 瘦到一條柴的身型(我估佢好大機會係為左套戲減磅), 非常配合角色, 而且演來不溫不火, 反而更顯冷血暗黑, 我覺得佢至少值得一個提名, 起碼做得比美國狙擊手的Bradley Cooper好。

當然美國狙擊手都係一套好戲, 奇連依士活仍然MAN爆, 繼續三分自嘲七分抬舉既大美國牛仔本色, 稍為偏離商業主流的表達手法風格依然, 但不經不覺佢呢個風格偏偏已經形成左一個商業標籤, 大家已經習慣兼睇得好爽。

Whiplash ok, 成套戲節奏都可以, 但題材唔算太吸引, 表達手法亦不新鮮, 肥仔主角唔算討好, 就係...ok啦, 唔太差咁啦...光頭男配角做得唔錯, 今年男配角無乜對手俾佢冷手執個熱煎堆。

Gone Girl 我覺得劇本本身出色, 所以先天條件下應該會/要好睇, 我嫌對於佢地的個人心理交代得唔足, 所以好多個位唔係好夠說服力, 尤其尾段。 兩個本來性格鮮明鬥chok鬥暗黑的夫婦, 結果變成變態+廢柴...有點可惜....

算啦, 講講下講左咁多...........都唔知有無人覆.......

呀.......最後講埋女主角.....其實我喜歡Two Days, One Night 既Marion Cotillard多D...............

羅力亞 2015-02-24 20:52
麻凡:完左先至討論........[表情]
原來你都咁喜歡睇戲, 下年早D開TOPIC一齊吹啦~~~~
你睇左果D我都睇哂, 大致上觀感都同你差不多, 今年真係男演員大爆發, 好多個都係影帝級演譯, 偏偏撞埋係同一年競逐, 可惜。
....... (2015-02-24 16:48)

唔記得開
加上之前有d未睇。。。
其實我都係略懂皮毛睇戲純粹係興趣，大家多d研究下就真

Birdman細心留意其實好多位諷刺緊現今影圈同演員，對白尤其抵死，仲串埋近年英雄片熱潮
其中一個位講個劇評家想寫衰Michael Keaton個度我覺得好正，完全演繹左咩叫一支筆可以寫死你，冇人睇你做得好唔好，一份影評足以抹煞你所有的努力。
Michael Keaton 係做得好，但主要係個角色完全為佢度身訂造，反而我覺得Edward Norton仲搶戲，做一個極度臭脾氣的大牌明星，自負得黎其實內心好幼稚，
佢夠哂入戲做得夠放，未睇whiplash唔知光頭男配角表現，但個人相當欣賞Edward Norton的演出。
btw其實長鏡扮一take過係仲難，唔明點解冇提名最佳剪接

Gone Girl原著已經好受歡迎，內容一定精彩，主要睇演員點演繹。事實上大家覺得虎頭蛇尾的主要原因係睇左1/3已經估到幕後黑手懸疑度大減，
加上解釋女主角報復的原因唔算有太大驚喜，同開局相比難免未能承接。不過整體黎講我好中意個故事，因為女主角做得太好宜家見到佢都有d驚

Jake Gyllenhaal好多人話佢值得有提名，真係要睇睇wor
不過冇計啦，今年對手太多，Benedict Cumberbatch都係陪跑
不過以佢實力將來應該仲有機會

posouth 2015-02-24 21:25
睇完奧斯卡搞到好想睇Birdman

Theory of Everything我都係覺得幾好, 但拍得好平穩, 真係睇男主角一個, 覺得遲D先睇DVD都ok個隻.

講番轉頭, 今年睇的戲其實最有feel最有印象係Interstella, 得咁少題名以為會攞哂, 結果掃得一個

羅力亞 2015-02-24 22:06
posouth:睇完奧斯卡搞到好想睇Birdman [表情]
Theory of Everything我都係覺得幾好, 但拍得好平穩, 真係睇男主角一個, 覺得遲D先睇DVD都ok個隻.
講番轉頭, 今年睇的戲其實最有feel最有印象係Interstella, 得咁少題名以為會攞哂, 結果掃得一個 [表情] [表情] (2015-02-24 21:25)


科幻片頒獎禮好難突圍的


雖然我好中意Interstellar，無論影象、特效都係一流，用科技、時空穿梭、四維空間、黑洞去帶出愛、親情、人性、糧食危機等主題，
從而讓觀眾反思宗教、環境污染、太空探索等具爭議性的話題，Interstellar無疑是野心之作，好有啟發性，引領大家去思考。
但正正是野心太大，接近三個鐘的篇幅都好似不夠用，劇情不夠完整，Nolan想講既野實在太多。

而且作為Nolan死忠，平心而論，Interstellar是不及他的其他作品，尤其是同類的Inception。
Inception好清楚將Nolan心目中對夢境的形象勾畫出黎，而且對入夢的描寫相當扎實，基礎理論、夢境設計都淺白易明。
相比起大部份人少接觸的黑洞、蟲洞甚至多維空間，Inception可以具體地將人想像的夢境建構出來，容易令人代入，最後結局更見心思。
Interstellar是好，但肯定不是Nolan的最好。(與其他好友討論詳見Interstellar個post)
但你問我Interstellar是否一套劃時代的戲？
我的答案是肯定多年後回想一定發現到Interstellar的偉大之處

@posouth




麻凡 2015-02-24 23:33
羅力亞:
唔記得開[表情]
加上之前有d未睇。。。
其實我都係略懂皮毛[表情]睇戲純粹係興趣，大家多d研究下就真[表情]
.......

咩叫略懂皮毛? 要識架咩?? 你都識講, 睇戲純係興趣, 而且好個人, 每個人喜好唔同, 自己喜歡就可以了, 鍾意既咪大家一齊吹水講下自己既睇法囉。
最怕果D扮到好識野, 然後人地喜歡同佢唔一樣片種既就話人地無品味唔識欣賞等等.....我鍾意王家衛, 又鍾意周星馳唔得架咩? 關你春事?

離哂題添~~~

講返Birdman, 其實度身訂造劇本我覺得無咩大問題, 一個劇本搵到一個適合既演員係難能可貴, 對於該導演更有如中了六合彩, 但好演員唔係咁易搵, 唔係點會一年先得三幾套大HIT既片。而坊間成日話某套戲邊個做得好係因為度身訂造俾佢, 所以一定好啦....等等...其實我幾唔認同, 覺得對該演員唔公平, 首先, 點解會有人度身訂造個劇本俾果位演員? 又唔見度俾你? 係因為該演員令人覺得有價值、有能力, 先至有人度身俾佢, 到最後, 出黎效果好唔好, 其實仍然係靠該位演員自己努力演譯, 你可以話角色啱佢, 佢好容易投入, 好易做得好, 但同樣, 如果佢稍為做得唔夠好, 一樣有人會話"個角色根本係為佢而設架啦, 咁都做成咁, 搞錯呀??"  其實佢可能已經做到90分, 平時一個普通演員有90分已經全TEAM開香檳, 然後影評大讚, 但因為大家覺得係度身俾佢的, 佢應該要一百分, 所以即使90分都要被彈。所以話, 演度身訂造的角色都唔容易, 壓力係雙倍的。而且能夠度身訂造出黎又有趣既劇本有幾多? 有呢種劇本又有呢種演員又肯接, 又能做得好又有幾多? 搵到適合劇本既演員如中六合彩, 搵到適合度身訂造既演員如中金多寶呀! 好似今次Birdman, 就算Michael Keaton 攞唔到影帝, 但佢個角色咁立體, 成套戲創意無限, 每個演員都盡興非常, 全部人打通哂任督二脈, 套戲由頭到尾都係亮點呀!
至於Edward Norton, 我都一直非常欣賞佢, 佢當年成名極快, 三幾年間已經由唔識佢到超紅, 由Primal Fear, 到野獸良民,  然後就到Fight Club,  我直接成為佢Fans, 點知之後佢就江河日下, 點到估唔到Fight Club就已經係佢頂峰了........今次Birdman入面呢個角色, 又何嘗唔係度身訂造俾佢呢.............

而相反, 我又一直麻麻果D扮演某某"現代"人物的傳記故事, 唔係唔鍾意, 而係覺得佢扮得幾似都好, 都只係模仿得好, 係有個框框俾左你, 演戲係個人藝術發揮, 有個框框管住始終係個阻礙, 除非係某d神聖級的頂級演員, 能突破模仿的框框, 仲可以有位加插自己個人詮譯而又不突兀, 令一個大家耳熟能詳的人物可以多添了新的元素面貌, 但呢種既有膽量又有演技既好演員又有幾多呢? 而係今次呢套霍金, 我亦都睇唔到有呢樣野, 佢係真係演得好似好似, 連霍金本人都話似, 演技亦都好好, 值得提名甚至攞獎, 但其實仲係個框框裡面, 我諗我未必會返睇。所以要演譯歷史人物, 我都覺得演D久遠D, 等演員無咁多掣肘, 等佢地多D發揮先係觀眾之福。

gone girl嘛, 我覺得個女主角其實做得都唔錯, 但唔可以話去到影后級, 老實講連有得提名我都覺得有d奇怪.........而套戲本身節奏唔太好, 敘事既比重有問題, 有d位點唔到題, 有d位又著墨太多, 其實佢已經刪減左原著好多看似不太重要的枝節, 但其實那些枝節係有助了解兩個主角的性格同心理, 而導演在刪減枝節後又沒有補充返對主角的心理描寫, 只純去發展劇情, 可能佢對個故事太有信心, 諗住忠於原著講哂個故事大網出黎就會成功, 的確, 佢成功了一半, 可惜係平面的, 不是立體的.......其實本來原著的結局已經有好多人唔係好喜歡, 但原著根基紮實, 角色性格背景心理動機清清楚楚, 最後結局如何只係增加話題性而已, 就算不喜歡結局亦不會太減分, 但電影的失衝就令人睇得唔舒服了.........

幾套男主角提名的電影, 我第一套係睇Imitation Game, 睇完我覺得Benedict Cumberbatch 呢次仲唔攞影帝?? 令到我呢個 sherlock迷(我估你都係?) 開心左幾日, 之後再睇埋birdman, 就知道佢無希望了, 再睇埋霍金, 有無搞錯?!? 唔止仲有一山高, 係仲有兩座大高山, 擺明要陪跑, 慘!(更慘係明明Benedict Cumberbatch 都飾演過霍金的說........) 不過我都覺得佢仲有希望的, 荷里活好似有唔少老闆都打緊佢主意......

火鳳凰 2015-02-24 23:45
麻凡:咩叫略懂皮毛? 要識架咩?? 你都識講, 睇戲純係興趣, 而且好個人, 每個人喜好唔同, 自己喜歡就可以了, 鍾意既咪大家一齊吹水講下自己既睇法囉。
最怕果D扮到好識野, 然後人地喜歡同佢唔一樣片種既就話人地無品味唔識欣賞等等.....我鍾意王家衛, 又鍾意周星馳唔得架咩? 關你春事?
.. (2015-02-24 23:33)

你地個個睇戲都咁快，我真係有排追了！ (而家仲要岩岩開始左你介紹果套劇集 broadchurch，睇左兩集想繼續追落去)

講返 gone girl，果日食飯我都有同你講，我覺得部戲本來都幾好睇，係個結局黎得有的兀突，而且有小小不合情理。

我無睇過本書，照你既講法，本書個結局應該描寫得無咁差？


同埋我都同意你個講法，個女主角係就係做得唔錯，不過離開奧斯卡影后既級數仲差幾遠……

麻凡 2015-02-25 00:22
火鳳凰:你地個個睇戲都咁快，我真係有排追了！ (而家仲要岩岩開始左你介紹果套劇集 broadchurch，睇左兩集想繼續追落去) [表情]
講返 gone girl，果日食飯我都有同你講，我覺得部戲本來都幾好睇，係個結局黎得有的兀突，而且有小小不合情理。
....... (2015-02-24 23:45) 

gone girl 本書中後段已經鋪排緊個結局, 男主角既內心變化令到個結局變得合理好多, 但電影幾乎無呢方面既描述............

broadchurch 第二個 season都差不多要完了, 我諗你會啱啱好順勢睇埋, 我小米仲未見到有, 要比你反超前了~~

羅力亞 2015-02-25 19:12
麻凡:咩叫略懂皮毛? 要識架咩?? 你都識講, 睇戲純係興趣, 而且好個人, 每個人喜好唔同, 自己喜歡就可以了, 鍾意既咪大家一齊吹水講下自己既睇法囉。
最怕果D扮到好識野, 然後人地喜歡同佢唔一樣片種既就話人地無品味唔識欣賞等等.....我鍾意王家衛, 又鍾意周星馳唔得架咩? 關你春事?
.. (2015-02-24 23:33)



咁我又唔係話為佢度身訂造唔好，唔係眨意黎既作為第一代蝙蝠俠Michael Keaton做birdman直頭有雙重意義tim。
我又咁睇，角色同演員既關係雙向，有好角色冇適合既人演係冇意義，反之亦然。
或者我用詞搞到大家誤會，我"度身訂造"的意思係指個角色設定同Michael Keaton現實相似，好似大家已經遺忘左佢曾經做過batman，唔係話Riggan個角色正正同佢現實遭遇相似演繹得好係應該。
你話齋比埋好角色你都可以做得差，而且揾到適合既演員飾演已經好困難，能夠將一個咁複雜的人物演活更加係難得，好似幫佢吐左一口鳥氣咁。
所以一個好角色需要有好演員去演繹，否則只係浪費;演員亦需要好角色去發揮演技，否則英雄無用武之地。
舉個例，Sam 哥轉左唔係吳鎮宇做會點？馬國明做柴九會咩效果？
所以完全同意Michael Keaton做Riggan係一個絕配，同埋你講得啱，可能劇本好d人都好戲左，唔止Edward Norton, Naomi Watts都唔差，連Emma Stone都好似冇咁浮誇

Gone Girl我冇睇過書，但自己偏愛一d懸疑片種，其實開局唔錯，但中段乏力，講女主角復仇個動機唔夠強。
宜家講緊用自己性命去屈人，好似仲爭d激起女角仇恨、不惜放棄安穩生活去陷害自己老公既轉捩點，
至於Ben Affleck，相信你比幾多內心戲佢都冇用咁樣傻下傻下同集中講女主角好過。
其實結局我又覺得ok，到最後大家都無辦法擺脫對方，焗住繼續做對人前恩愛的模範夫妻，幾諷刺，正如個律師講，你地真係天生一對。

Rosamund Pike今次先算係真正有代表作，我覺得演員最緊要係有突破，但獎只有一個，而且Amy個角色太陰暗，不利爭獎加上其他人都值得拎，
拎唔到係合理，但我認為Rosamund Pike今次演出值得認可。

其實演真實人物唔係咁易。第一，已經有個真既係度，你演得幾好都係有限度;第二，之前已經可能有人演過，觀眾一定會先入為主，將你同前人比較;
第三，即使係古代人物，佢地既固有歷史形象都會影響到大家的觀感，例如曹操一定係老謀深算，戴卓爾係鐵娘子。
你如何保持人物固有形象而又表現出自己的演技與眾不同？稍一不慎觀眾不接受你的演法就大鑊了。
加上如你所言古代角色尚有較大發揮空間，近代人物大家更加清楚其真實形象。而且霍金行動不便又無法說話，大部份時間用對眼做戲，演繹更加困難，
因此要用心揣摩其神態及小動作以表達出他的情感，甚至閱讀他的著作以了解他的內心世界及對科學的想法。
Eddie Redmayne能夠做到如此境界，封帝實至名歸。

我當然係Sherlock fans la，我都想BC封帝，不過獎項既野整定，冇得強求。
劉青雲夠好戲啦，米得一次金像獎咁大把(今年又兩個提名了)
最緊要你係大家公認的好戲之人，得到觀眾欣賞，我相信總有一日會拎到應得既野！

麻凡 2015-02-25 20:51

咁我話為佢度身訂造唔好，唔係眨意黎既[表情]作為第一代蝙蝠俠Michael Keaton做birdman直頭有雙重意義tim。
我又咁睇，角色同演員既關，有好角色冇適合.......

呵，無誤會無誤會，我完全無打算反對或反駁你任何一隻字，我只係講出自己觀感，你大部份評論我都好認同，大家大方向睇法相似，細節稍有不同是好事，攞出黎討論下交流下感覺非常好，只要無人用強硬的語氣態度迫人認同或搞事，這類討論真係多多益善，期待再有呢類topic 同你多d 交流~~~

羅力亞 2015-02-25 21:22
麻凡:呵，無誤會無誤會，我完全無打算反對或反駁你任何一隻字，我只係講出自己觀感，你大部份評論我都好認同，大家大方向睇法相似，細節稍有不同是好事，攞出黎討論下交流下感覺非常好，只要無人用強硬的語氣態度迫人認同或搞事，這類討論真係多多益善，期待再有呢類topic 同你 .. (2015-02-25 20:51) 

大家咁話，遇到愛戲之人感覺十分好
最緊要多d互相交流，理性討論
睇戲一個人睇唔夠的，因為唔同人唔同角度甚至個人經歷都會令大家有唔同睇法，依樣正正係睇戲得意、過癮之處
希望之後繼續多d好戲，多d交換意見  

羅力亞 2015-02-27 00:48
睇埋Nightcrawler了
出字幕第一個感覺，為左"造"新聞，你可以去到幾盡！
首先一定要讚下Jake Gyllenhaal，為左演繹一個冷血怪人而激瘦30磅，個種空洞的眼神加上深陷的面頰、瘦削的身材，配埋幅黑超，隔住個屏幕都感受到佢身上散發出的邪惡氣息。
今次應該係Jake Gyllenhaal從影以來一大突破，有份做製片既佢戲中幾乎冇感情冇喜怒哀樂，唯一令佢興奮既係有人受傷甚至流血，因為佢造新聞的機會又來了。
聽聞佢打爆玻璃個度真係受左傷的！其實Jake Gyllenhaal有機會入圍男主角的，不過個角色實在太黑暗，冇法了。

其實Nightcrawler最黑暗的不是取景以夜晚為主，而是新聞工作者為求收視率同話題性可以放棄道德底線。
夜晚跑新聞比警察更早抵達現場的Lou，越血腥越核突佢越開心，甚至不惜去搬屍、設局報案引致槍戰甚至推助手去死，就係為了幫段新聞賣個好價錢，其他野咩死人冧樓，Lou doesn't care
電視台新聞總監為左搶收視製造話題，不惜踩界播血腥暴力片段，務求令觀眾恐懼，從而更相信更依賴電視台的信息同觀點。
片尾警察無法控告Lou，Lou更將其"業務"擴展，明顯諷刺新聞自由這塊免死金牌下新聞工作者的採訪自由凌駕他們的職業操守。
究竟新聞自由、讀者知情權重要，還是市民的私隱及傳媒的企業道德比較寶貴？相信大家心中自有一個標準。


查看完整版本: [-- 第87屆奧斯卡得獎名單 --] [-- top --]


Powered by phpwind v8.7 Code ©2003-2011 phpwind
Time 0.130392 second(s),query:3 Gzip disabled