羅力亞 |
2016-11-18 11:46 |
桑齋 16 hrs · 《載體的局限:越好睇的動畫,越唔可以輕易真人化》
啱啱《鋼鍊》真人電影出咗30秒預告,我身邊啲朋友睇完紛紛表示既期待又怕做爛會為原作留下污點。我想同大家講:唔洗諗,爛硬。
《鋼鍊》係我心目中兩套完美的動畫之一。而所謂完美的作品,其中一個條件就係完全不含多餘成份。《鋼鍊》故仔的主線由兩兄弟單純想鍊成過咗身的媽媽,失去身體,繼而踏上國家鍊金術師之路開始,到識穿人造人的陰謀,發現成個國家建立都係為咗整粒石,最後同父親大人決一死戰,連世界真理都參透埋。成條主線一氣呵成,零廢話零冷場。
即使係副線、配角,甚至所謂閒角,都對主線起咗好重要的承托作用。只要無咗任意一個角色,某段情節,成個故事的平衡感就會被破壞。
唔要妮娜?唔好傻啦,諗起都想喊。 唔要馬爾哥醫生?邊個代表亞美斯特利斯人向斯卡道歉? 張梅同姚林?無張梅的鍊丹術,點可以發現呢個國家的「氣」有問題?無姚林,邊個拉攏貪婪加入愛德華陣營?
就連住喺深山嗰個機械鎧技師個大肚新抱,都帶出咗不容忽視的效果。無咗接生嗰幕,愛德華又點可以再次明白生命到底係幾不可思議呢?鍊金術發揮到極限,去到要犯禁利用賢者之石先做到的「人類創造人類」,其實人類本來憑住內在自然的力量經已可以做到。呢段雖然係成個故仔入面經典中的經典,但我可以肯定,真人化電影個導演同編劇應該二話不說就飛走佢。唔係話佢地唔理解個段的意義,只不過礙於時間所限,無奈忍痛放棄。
《鋼鍊》人設同人物關係的細緻,情節之間互相推進,造就出最終如此宏偉而嚴謹的世界觀,絕對需要足夠的時間去舖排先能夠做得到。廿七本單行本,六十四集動畫的內容,刪減成得返兩個鐘頭多,你答我點先會搞得掂?
就算真係幸運地能夠改編得恰如其分,佢都只會係一套用鍊金術做題材的好電影。絕對唔會係荒川弘筆下的《鋼之鍊金術師》,唔會係大家心目中的神作《鋼之錬金術師》。
有時並唔係真人化電影的製作人唔尊重原作,或者原著黨觀眾過份追求重現云云。係電視動畫同真人電影兩個載體有佢地本身的局限,兩者之間本質上就存在住難以跨越的界線。而「時間所限導致劇情取捨」只係咁多條界線入面,第一條最明顯需要面對嚟啫。 |
|