回帖︰路過見到呢個 topic，忍唔住破戒 login 入黎講返幾句。

先講講我自己既立場，我唔係任何黨派既 fans，理念上我會較接近公民黨，但係我唔會投佢地，理由就唔係呢度講住。我同大家一樣都覺得有的人力 fans 好討厭，而且眾所周知我亦係一向好唔鍾意黃毓民果種唯我獨尊，係人都鬧，有佢講無人講，全世界衹有佢一個人岩晒既性格。

我自己今次投票取向新東既一票會投俾長毛，超級區議會會爆粗忍淚地投俾馮檢基呢個賤人(我自己考慮過投白票，不過最後都係決定唔咁做)。

但係見到大家係度圍攻 kenlo，有的見解我唔係太同意，所以我都忍唔住入黎為佢講返幾句說話。可能 kenlo 作為人力 fans 實在太投入，唔識抽離自己去睇問題，答大家問題時以人力為尊不斷護短，講唔到問題核心所在，所以俾大家插到飛起。

首先，就選舉策略黎講，我覺得人力選擇去狙擊民主黨係正確的。可能大家對於攻擊所謂既同路人睇唔慣，但係其實民主選舉本身就係一個咁殘酷既遊戲，大家搶選票唔係你死就係我亡。例如今年年初美國共和黨總統初選，候選人們一樣係互相攻擊、互揭瘡疤、互爆陰毒、火花四濺，完全唔理會咁做會影響之後既真正大選。同一黨派的人況且如此，更何況係不同黨派的人？而且嚴格黎講，民主黨已經唔係佢地既同路人！點解我一陣會講。

大家亦可能覺得應該同一槍頭去鬧民建聯工聯會，去搶佢地既鐵票。但係可以點搶？大家不斷鬧民建聯無恥，鬧足十幾廿年，但係四成幾既鐵票絲亳無損。你剩係睇下今次辯論初期，黃毓民狂插蔣麗雲既所謂愛國，段片係 youtube 瘋傳，但係結果蔣麗雲民調支持度紋風不動！

跟住再講講果個所謂既關鍵24席。我見有人講話多一票可以幫手阻止惡法，呢個係完全錯誤的。政府提出的議案只係需要全體議員超過一半贊成就可以通過，所以除非反對派可以拎到 35 席，唔係係無辦法阻止例如23條呢類惡法通過的。至於議員提案就非常離譜，要分組點票，直選同功能組別都要過半數贊成先可以通過。此舉非但阻礙泛民議員提出重要議案或重要修訂，同一時間連保皇黨都一樣無辦法咁做，因為就算佢地功能組別過到，地區直選泛民把關之下都一樣過唔到。咁樣就造成完全由政府行政主導，所以各候選人的政網其實無咩大作用，莫講話佢地無執政的權力，連提案的能力都接近被廢了。所以立法會議員唯一功能就只係剩監察政府一項。

咁果關鍵 24 席呢？其實只有政改呢一樣野係需要全體三份二通過，所以只有呢一議提先有關鍵 24席的存在。泛民的組成唯一可以真正實際做到既事就係否決政改，所以係政改呢個單一項目上，泛民係有默契大家要協商，保持同一陣線對敵，去同政府周旋。

我未深入了解呢樣野之前都同大家一樣，覺得上次政改民主黨只係路線同大家唔同，唔值得去大罵佢。但係我而家明白民主黨的可惡唔係在於支持政改方案或者政改方案既內容，而係佢地為左自己私利，完全無知會盟友，私下走入中聯辦，出黎就自行宣佈支持政改。至於佢地有咩野私利？大家剩係睇下個超級區議會選舉，差不多係為佢地度身訂造，提名門檻極高，其他人例如公民黨既鬼佬文想選都無得去選，而佢地無驚無險毫無難度就可以拎多兩席。呢種陣前倒戈既做法，雖然未致於人力指責佢地既賣港投共，但係為左一己私利背棄盟友就係鐵一般的事實！佢地竟然仲可以係今次選舉厚顏無恥咁講話去爭取關鍵 24席！真係極其無恥！

所以泛民係上次民主黨背信棄義之後已經差不多形同瓦解，分裂泛民既正正就係民主黨，當時係人力同社民連既角度已經再無當民主黨係同路人。連公民黨吳靄儀都心灰意冷咁講︰

「其實上一屆（2008年）已經唔想再選，但當時覺得放唔低，因為立法會有三分一的關鍵少數，保唔到的話，感覺好危險，所以法律界呢一席好重要，唔可以唔選」。
「但政改方案一役，當民主黨同中聯辦磋商，我就發現政府根本唔須要同你爭一兩票，佢哋有辦法令成個黨派支持，個條線已經唔再係三分一咁簡單」。

咁大家可能會問，咁點解公民黨唔狙擊民主黨，而人力就一直打正旗號狙擊民主黨呢？因為公民黨的目標選民係溫和民主派，不恥民主黨所為既原來民主黨選民，溫和既就會沉默地轉會，根本咩野都唔需要做。所以毛孟靜係論壇話上次敗陣原因係因為民主黨既告急，唔係因為受到人力的狙擊。咁講唔係因為佢大量，而係策略上公民黨巴不得人力繼續狙擊民主黨，因為民主黨失票其中有一大部份就係流向公民黨，佢地可以樂享其成。而人力既策略就靠不斷漫罵民主黨，出本「民主黨賣港實錄」，將民主黨無恥之處講俾民主黨的選民聽(當然當中有唔少跨大之處)，吸收佢地較為激進的選民。呼籲選民超級區議員投白票亦係用黎箍住呢的憤怒選民的策略。

好似我有好幾個朋友都係因為極嬲民主黨，今次轉投人力。佢地都唔係憤青，只係同我差不多年紀既中產。我自己就反而無咩感受，因為我一向都唔相信民主黨，從來無投過俾佢地，之前兩屆都係投長毛，再之前就係投俾黃宏發。

我個人覺得，就選舉策略黎講，人力今次係成功的。大家亦可以睇下同係激進民主派的社民連，今次就好似大家所講咁，只係攻擊建制派，將民主黨當做同路人，得到好友們的讚賞。但係結果係點呢？民調顯示除左長毛可以食到老本保住基本盤之外，其餘幾個都係慘不忍睹。陶君行紮根九龍東黃大仙超過廿年，支持度仲低過石頭爆出黎既黃洋達；另外，綜合各個論壇辯論，吳文遠表現好過人力果個 141 兒皇帝多多聲，不過民調支持度差幾倍。阿牛仲慘，冒生命危險上埋釣魚台，返到黎都全無起色。點解會有咁大差異？我個人認為就係因為社民連係民主黨政改事件立場太含糊唔得清浙，吸唔到民主黨流失既選票，，論壇上選擇攻擊建制派亦當然郁唔到佢地既鐵票，所以策略上我覺得佢地係失敗的。

以上發左咁多up風，係小弟呢個幾月來睇晒所有選舉論壇，睇左唔少選舉分析，得到一的少少既結論，當中可能會錯漏百出，敬請原諒。

有緣再傾過。