回帖︰icemanbergkamp:火兄多d返黎la.....
btw, 可唔可以講埋閣下唔投公民黨既原因......(想聽多d唔同意見, 擴闊視野.... ) (2012-09-07 12:34) 
理念上我個人係極尊重法治，憎恨人治。經濟上我係祟尚右派自由經濟，唔鍾意民粹主義。所以宏觀咁多政黨，公民黨係理念上同我較為接近，兩個激進民主派反而係南轅北轍。但係我唔投公民黨，因為正如上面我都有講，我而家唔係投個議員入去執政。立法會議員連提議案的能力就差不多被廢了，只係剩返監察政府一樣。所以政網同理念相對既重要性就較低。
拿，先聲明下面只係我個人睇法，可能只係杞人憂天。
大家睇左果個「ATV 焦點」，可能會覺得好笑同離譜，但係我就覺得有的心寒。呢種極左的思想同說法正正好可能就係現時西環既想法，就係佢地對現時香港既定性。梁振英上場之後強推國民教育，深圳一簽多行(雖然現時壓力太大，暫時收回)，仲有遲的既東北發展區。凡此種種，都俾我一個感覺，「ATV焦點」內講既「建設派」係正在建設一個大陸化的香港，而「破壞派」就係度嘗試破壞大陸化，亦即係今次選舉各個泛民都有提及既防止赤化。
但係係一個不公義不公平的議會內，要破壞/減慢談何客易呢？正如一場球賽，對方已經收買左球證旁證，你仲正正經經咁去同佢打，到你幾經辛苦帶到個波入禁區準備射門之際，佢就可以連龍門都搬走埋。
所以基本上呢場係一場爛仔交，打爛仔交你會揀個西裝畢廷、斯斯文文、樣樣循規蹈矩既大狀去打定係揀個黑社會、陰招多多、下流賤格既流氓去打？
再重申一次，以上只係個人觀點，每個人都有自己唔同既睇法。
如果你覺得西環同梁振英係真心為港人做事的，請投民建聯同工聯會一票，佢地會想盡辦法幫你阻礙搞破壞的人。
如果你相信西環同梁振英，但係仍然有少許擔心，想買個保險，就請投自由黨、新民黨一票。若果萬一不幸有事發生，都有些微希望佢地會係重要議題上轉軚，企返係香港人果邊。
如果你希望香港建設一個健康民主社會，相信我地最終係會爭取到真正普選的話，請投公民黨、工黨、新民主同盟等等泛民政黨。
如果你較為悲觀，唔相信大陸會俾真普選香港人，只係希望減慢香港大陸化，就請投社民連、人民力量。
如果你想…………，就請投民主黨。