呢個世界，沒有無緣無故嘅愛，亦沒有無緣無故嘅恨，因此當全國政協劉夢熊近日力撐毒奶粉苦主趙連海，高分貝挑戰北京法院、狀告中央，確係令好多人既驚奇又意外。需知道政協係政治花瓶，保駕護航係天職，為民喉舌唔係份內事，劉夢熊今次出晒位，政圈近日傳出小道消息，指劉夢熊尋釁滋事，「唔係咁簡單」！
有政界人士向八方透露，劉夢熊在趙連海被判刑後，曾向人提及民主黨、社民連等泛民政黨，一定會趁機攻擊中央、批評內地司法制度，既然本地左派、親京人士都認為判刑有問題，何不帶頭批判，先聲奪人總好過俾泛民攞晒彩。
護趙連海 儼如左派良心
劉夢熊言出必行，先在報章登大字報，再喺公開場合發炮，侃侃而談儼如「左派良心」，令唔少市民另眼相看。劉夢熊係商人，唔會做蝕本生意，冇理由貿然高調地與中央唱反調，因此政圈中人相信佢計過數。有消息更指，佢正在盤算出選立法會，家陣為趙連海仗義執言，正是累積聲望好時機。
2012年立法會選舉多 10個位，角逐超級區議員要 600萬元選舉經費，對劉夢熊而言不是問題，不過循呢條線出選，明年要先下海選區議員，八方相信劉夢熊冇咁多時間，因此出戰直選機會較高。至於去馬邊個區，以佢現時知名度，選擇可以講十分多，港島區歷年來都缺乏劉夢熊呢種「麻甩佬」形象候選人，出選港島可能有意料之外嘅化學作用。
西九亦係劉夢熊理想戰區，因為有黃毓民做對手，兩個麻甩佬鬥大聲，八方認為劉夢熊有機會「格食格」撼低黃毓民。同劉夢熊做過交易嘅「金牌莊家」詹培忠，噚日亦話覺得劉夢熊有意出選立法會，否則唔會忽然轉軚為趙連海申寃。
詹培忠對劉夢熊言行不以為然，噚日更發出公開聲明，質疑有人「是否意圖利用職銜，去譁眾取寵混個名堂」，深感與劉「見解不同，懷抱各異……無意高攀」，所以「從此割席」。
http://hk.apple.nextmedia.com/template/apple/art_main.php?iss_id=20101125&sec_id=4104&subsec_id=15333&art_id=14699075&cat_id=45&coln_id=20 
