引用第18樓迪克於2008-10-08 01:30發表的“”:
咁我始都認同銀行職員方面係有唔o岩o既
之前睇有線直播新聞
播佢地個苦主大會,多數d人 o既pt.都係話銀行職員d操守有問題
政府又唔管理下d銀行sales o既做法諸如此類啦
.......
其實所有sales 都係信唔過架啦！
地產代理咪一樣成日老點！賣電話，推銷寛頻，金融經紀……所有sales 講既野，你都應該要過濾。點解銀行既就一定會講真話？係！銀行比人既「感覺」真係好似穩陣d。但當你既投資係講緊幾十萬幾百萬個陣，點可以話咩都唔知咩都唔關自己事？
我一開始，都覺得佢地慘。因為佢地唔係炒期指，炒權貨。個d ，蝕左都無話可說。佢地好多只係諗住保本，或者賺多幾% 利息。諗都無諗過會血本無歸。所以佢地真係好慘。開始個陣。我都好同情佢地。
不過，未發生事之前，有人同你講，匯豐銀行會執粒，你會點？我諗你會指住佢黎笑囉。「匯豐銀行執粒香港都玩完啦」。但宜家大家先知道，真係世事無絕對架。所以我相信，當日同佢地講「好穩陣」既銀行職員，唔係存心呃佢地，而係佢地真係相信，呢類投資係好穩陣既。雷曼喎！唔通會執粒咩？點知結果真係會執……
事情發生左，佢地好慘！但同時，佢地亦好好彩。因為佢地係香港人。全世界無咩幾多個政府會係咁既情況會理呢d 因為投資失利而損失既苦主。政府已經幫佢地爭取到取回六、七成既本金，相對渣都無，呢個已經係不幸中既大幸！！你買左股票，一跌跌五、六成都有啦。咪當自己買錯左左股票囉。最緊要係攞得番大部分既資金。有資金，你仲有機會東山再起！
但佢地仲唔滿足，竟然要求全數取回所有本金。咁即係話，係呢件事上，佢地認為佢地自己為零責任。完全無問題！完全唔需要為自己既投資決定負上絲亳責任！咁都講得通既話，仲得了既？第日d 人炒濃股票個個開口問政府攞番咪好唔掂？
最緊要，若然佢地真係要求政賠償（呢點有待查證），我就直情反對！你私人投資，點解要我地納稅人賠比你？？？咁邊個賠比我地？
