快車三連伏！|【YAHOO足球經理人大賽 - 遊戲資料】 - 【好友論壇】- 以足球會好友

離線freezefox

署理壇主

發帖: 161221

好友元: 362107

閱讀權限: 260863

貢獻值: 13

只看樓主倒序閱讀使用道具樓主發表于: 2012-11-29

快車一到，處處中伏。

第一關大家被曼聯同愛華頓伏到應一應，第二關好多人個心態求穩陣，點知，愈穩陣愈中伏。賽前一致睇好正選機會最大既迪維斯偏偏坐冷板，仲要係坐足全場，連後備上場既機會都無。賽前CS 信心最大既史篤城，爆CS 都唔緊要，全線後防幾乎0分！反而最平既疏頓都仲有3分。其他侯夫、疏哥斯、甘馬倫死到直一直，買邊個都死！真係十分罕見既現象！第一關買VPS ，低分收工，諗住穩穩陣陣買個雜分多既朗尼，今次就輪到朗尼低分收工。第三關，大家仲會買邊個？真係買個個死個個！買小緊佢REST 小緊，放小緊佢出小緊，費SIR真係欠小緊………

車仔主場，賓賓應該要全力爭勝攞個彩先岩架！點知排個陣出黎保守到唔保守！馬達都要後備。又死一件！聽講全場悶戰，賓賓手執4條A 3 條K，卻攞個無TWOTWO 既死守陣出黎，咁既形勢，你真係點買得車仔D 進攻球員落手？唯一安慰既係，你低價買左艾斯派古達既，應該仲有一兩場CS 執。

晨早六點爬起身，都未清醒，就要接受被莊家通殺既殘酷現實，然後馬上又要收拾心情，開始偷人，眼見D 球員唔係太貴就係太搵笨，同香港人買樓一樣，明明唔值，但唔值都要谷住買，買埋買埋一手貴價名牌搭一大煲豬骨湯底，個陣騎騎尼尼點睇都唔順眼：

施治

SORRY     疏頓    辛特路斯
卡穌    LALA   史0    魯迪治
基佬      S7      VPS

籠門：前周洛里斯同施治之間選洛里斯！這是一場十分危險的賭博！即使第一場看似有利，實際前路極之難行。以後個個星期都要同個兩蚊籠門鬥回報，難度分係9.9！實在有少少後悔當日既衝動。但現階段只能見步行步，睇下會唔會係黎緊既雙賽周爭取番少少優勢。

後防：慘不忍睹！SORRY 唔計，疏頓下周仲有冇正選都未知。就算有正，作客對住西布朗都唔駛旨意CS。BS 或其他防守分又未必多。呢兩周既上湯靚骨，煲左兩煲，咩味都無哂，係時候要考慮換骨了。辛特路斯，無錢之下夾硬買住黎頂檔的大大舊豬頭骨。雖然主場，但對手係勢刺，勝負難料。

中場：前三個係KEEP 人唔討論。買魯迪治唔係因為我睇好佢，係因為手上得番六個幾，得佢同奧斯卡可以揀，又岩岩見出分，佢有二十幾分，偷人原則下，先偷左佢先。其實佢下一場仲有冇正選我都唔肯定。佢好似已經成為輪換既對象，非必然正選了。

前鋒：基佬唔駛講。S7 係本周MUST BUY！剩下既就係信完佢一周又比佢洗一周既VPS。今周雖然作客，但對住雷丁，好難想象曼聯會無波入。但唔知邊個入者。連買四周，第五周仲落唔落疊好呢？

策略：快車三連伏去到尾關，各隊球隊八九日內打第三場波，你話唔攰就呃人既。個別球隊人手充足都仲可以輪換，但二三線球隊黎到呢一關，一係就咬緊牙關捱埋去，一係都要接受現實，二三線兵都出住黎頂住先。有理由相信，第三關會比頭兩關更伏！買人更難買。求正選係第一首要條件。好似利記既S7，我估佢未死都要出場踢。賽程又好，今周唔買佢無疑係玩命！VPS 成26蚊身價。過廿分都未回到本，又驚連踩兩場後第三場唔知會唔會比佢抖。但觀乎曼聯既情況，又真係唔多有條件比佢抖，無咩邊個擔到大旗。小豆一正選就無野睇，楊格打打下打埋後備，華西未知出唔出得，朗尼獨力難支！睇黎第三關都係要押係佢身上。

否則，玩分散投資都未嘗不可。賓賓跓場後，車仔似乎風格有變，要再待觀察先知是否值得投資。但可以肯定既係托利斯會得到好多既機會！賓賓似乎想力谷佢咁。上場無波入下都可以回本。今周只升左兩三亳，要追落後既話，呢隻會係黑馬！VPS 換王子既話，就可以多番十幾蚊出黎，到時後升級到安歷基也不是夢了！食少幾件骨，只求平穩過渡。