先講下我對HKEXPRESS 呢間新既廉航既評價。
性價比：5星！1400 蚊連稅連燃油附加費！呢個價只能用無敵黎形容！PEACH 都無佢咁平，時間亦無佢咁好。
航班時間：4星！十分理想。去程9:30 ，去到大阪都只係2:00（日本時間），CHECK OUT埋，買埋PASS，搭埋JR 出大阪，4點可以返到酒店。去京都既話，5點前亦無問題。仲有半日時間可以玩。回程3:00，可以係酒店CHECK OUT 之後，沿途食埋飯先再施施然去機場，夾岩時間既話，難波去機場只係7個字。時間充裕。
準時度：5星！只係講我今次既經驗，唔等同佢一直會保持到。去程回程完全無DELAY！十分準時！滿分！
方便：2星！無得網上CHECK IN！熱線聽講十分難打通。無事無干就無所謂，有問題起上黎想搵人幫都幾頭痕。
效率：5星！無論係香港定係大阪，CHECK IN 時間唔駛15分鐘（因為好離奇，兩程都唔多見人排隊CHECK IN，但班機係滿架喎）。有足夠櫃位提無服務。
舒適度：3星！合格。唔覺得特別窄，坐三幾個鐘機都可以接受。飛機係細機，但飛行時尚算平穩。無咩FING 上FING 落。不過呢D 睇彩數。
餐飯：N/A！因為要額外比錢。貴唔貴？實貴架！一罐汽水收你廿蚊。不過連埋個飯，一個餐收你65，又唔係話唔能夠接受喎。去程我都幫襯左佢食個餐，OK 喎！幾好食添！
空姐：5星！去程無咩特別。空姐幾後生！但回程不得了囉，比我見到兩個十分之答得杯落既空姐。其中一個直頭係索！我自問都搭過幾次十飛機，呢位空姐係我見過咁多位空姐之一最靚女既一位！
總結：除非日後佢既價錢上升得好緊要，否則，再去大阪既話，我既首選一定係HKEXPRESS！
[ 此帖被freezefox在2013-11-28 11:48重新編輯 ]
