一時又話要珍惜眼前，千祈咪愛得太遲，難講嘅都要趁住人哋聽到，快啲講句我愛你。一時又搞到而家咁，好似示愛都有罪喎，問題係邊個向邊個示愛，同埋點樣示法咯。假設若果甘乃威向你示愛，咁你又點呢？又或者係何俊仁向你示愛，你又點啊？又例如係譚香文同時間向你示愛，你又接唔接受呢？其他黨喇，長毛向你示愛，咁你會唔會拒絕啊？再上嘅官或者司長點睇啊？假如曾德成局長向你示愛，咁你估你會唔會要幫襯瑪麗醫院通波仔呢？
唉，都係做artist著數啲啊，企喺頒獎台、舞台上面，激動嘅時候就順便向全場嘅粉絲示愛，一次、兩次、跟住三次都無問題啊。場場紅館show同一個位向歌迷求愛段稿，晚晚一樣照喊，就算疑似虛假，粉絲都會接受喇係咪？豹紋Sam哥許冠傑唔止示愛添啊，仲攬埋粉絲錫粉絲，大家都不知幾happy，無依個環節直頭要去消委會投訴佢。調轉頭，粉絲都係會向偶像示愛，大聲嗌又有啊，舉晒牌明刀明槍例牌咖喇，靜雞雞近距離倚靠一下，「借啲椅」俾埋眼神又何妨啊，你情我願啊嘛，公平交易。
示愛依家嘢咯啵，睇邊個示喇、向邊個示喇、同埋點示嘅啫，參選嘅時候，參選人夠向嗰啲選民、甚至係平民示愛，都仲未計嗰啲政治人物時不時向香港市民示愛，向香港示愛，喂！依啲真係無王管喎。你個朋友或者你，都可能有嗰件心口印著I love New York嗰個logo嘅T-shirt，嘩！向紐約示愛，有無問過人哋受唔受先，一個唔小心，可能會變成性騷擾咗紐約嗰喎。仲有嗰啲我愛大自然啊、甚麼我愛夏日長、我愛維港、我愛郊野公園，會唔會全部都係一廂情願啊？我愛份工，嘩！聽落依啲肯定係自作多情啊，示愛無得夾硬嚟嘅，要睇對方接唔接受之餘，都要問番自己係咪貪一時口爽，過下口癮，口花花是但嗡啊，定係發自內心啊？譬如嗰啲咩心繫家個我愛祖國大中華依啲，不過今時今日講到尾，向「阿爺」示愛都係講多好過講少嘅。
