就快一歲啦！ [復制鏈接]

仲有一個月，我個缸就足足一年啦！

趁佢「生日」之前，影番輯相留念先。


魚缸上層之剪影

餵魚之際，群仙亂舞！

全缸照

法仙

呢條係法國神仙，俗稱法仙。但係佢唔係黎自法國架喎，係黎自美國架喎。呢條仲係bb魚黎架。由一吋鬆dd，養到宜家都有2吋。養左足足九個月，大得好慢。但食就食得好多。成個缸最為食係呢條魚。

黑色魚身，鮮黃間條，令佢係影相時，永遠係最搶鏡最靚個條。

白尾藍紋


白尾藍紋屬於白尾既幼魚。呢條黎自馬爾代夫，得兩吋大，都係bb魚，未變身。身上紫藍底白紋，非常鮮豔。可惜我部機唔夠勁，影出黎d 紫藍色唔係好出。呢條都養左九個月以上，屬缸中陀地之一。次次餵食，都係佢同法仙最早衝上黎搶食。仲成日啄我手指添。

多利：藍倒吊精選！

送比比比既！佢話佢鐘意喎。

呢條養左半年多d。之前好細條，吋零，又成日生白點。所以食極唔肥。前排攪掂哂d白點後，唔知係咪突然吸收好左，兩個月內爆肥！大左成個碼，宜家有兩吋多dd囉。活潑好動，仲好大力。我餵紫菜個陣，佢一口咬住係咁扯，嚇到其他魚都唔敢埋去爭。

毛仔：小丑篇

每個咸水魚缸都幾乎一定會見到既魚。但同時，亦係十分難養到既魚。因為大部分小丑都係用生埃「杜」番黎。所以捱唔到一個星期就香。好彩比你撞手神買到條中毒無咁深既，養到超過一個月既話，咁佢都幾乎可以同你個缸共存亡咁滯。

藍紋

好多仙魚既幼魚時期，都係藍紋咁既樣。包括北斗、馬鞍、藍面、藍紋、六間、耳班。呢條我相信應該係藍紋既幼魚。但其實我都唔係太識分。佢其實比法仙、白尾更早入到我個缸。佢先係老大哥。養左超過十個月。但偏偏佢個陣就細細條，得個吋零，所以後加既白尾仲惡過佢。前排起白尾係咁抽水添。

但佢亦係我最煩惱既一條魚。因為佢實在太多口啦。成日無厘頭突然咬我d珊瑚。先後食左成舊「豬腰」同分支腦。真係又愛又恨。

火焰仙

非常敏捷既火焰仙，鮮紅既體色，係我至愛魚種之一。但真係游得太快，養左佢半年有多，影到可以見下人既就係得個幾張相。

我一定要影到一樣靚靚既再post 過。

黃倒吊


最易影都係呢條魚囉。因為黃甘甘，夠哂反光，最易爆光。條魚都養左三個月多d。黎自夏威夷。岩岩黎個陣，瘦到個肚笠哂！宜家就肥肥白白。證明好食好住也！
















藍、紫、黃三吊同途。好難得影到一相全吊圖。因為條黃吊唔鐘意條紫吊，成日凶佢，無幾可可以游得咁埋架。

紫吊

新成員！我一開缸就想養佢，但成日都唔見有得賣。見到，又大條得滯，唔岩SIZE。等左大半年，終於比我等到呢條吋零既紫吊。黎自紅海，跟左我兩個月都唔夠。宜家係缸入面既細佬輩。但吾好睇少佢，一養定左，好鬼惡架，係魚都打架。

由於太深色，無張相影得清楚，大家張就下啦。

巴士

以食苔為生既巴士，係缸中清潔部隊，食苔能力一流。但養左唔夠一年，大左足足三倍以上，開始令我擔心佢會掃跌哂我D珊瑚。養左咁耐，一次都未試過影到佢個樣。個次無厘頭見佢突個頭出黎，即時係咁閃！終於比我影到佢啦。各位觀眾：青龍出洞！



黃龍

日頭搵食，夜晚鑽沙既黃龍，成日同佢主人我緣慳一面。鬼咩，大家既生活節奏岩岩相反。所以好難得影到佢個樣架。仲有一條養得仲耐既紅龍，就連相都影唔到。因為佢比條黃龍仲要早訓。五、六點已經唔見人。幾鬼健康……



珊瑚美人

同屬缸中極度難影到既魚。養左成年咁滯，就係無咩機會介紹比大家識。得呢一張相都係影得黑影一團……無計。

馬鞍

新成員。黎左個零月咋。仲要岩岩先放入大缸無耐。勁怕羞。一走理去就「呢」係石係面唔出黎。真係擔心佢食唔飽。之前養過條，養左半年，因為一次唔意外身亡，近排先買番條補充。亦係我至愛魚種之一。

呢條約兩吋鬆d，係缸中體積最大既一條。一般而言，兩吋零仲係幼魚，應該係成條藍紋咁既樣既。但呢條就提早變左身。已經係成魚既樣啦。

暫時得一張相，遲D 會愈影愈多。

藍面

新成員，同條馬鞍同期入倉！都係個零月到。但比條馬鞍大胆，一早開哂口，周圍搶野食。算係粗生既一樣魚。呢條只係兩吋到既幼魚，一般係應該未變身既（即係成條藍紋咁啦），但呢條就早早已經變左身。有人話係因為海入面d 藍面比人搶哂，無哂成魚，谷住d 幼魚都要「提早」變身，準備交配。係就陰公囉……

醫生蝦


我養左兩隻醫生蝦係個大缸到。頭頭尾尾都十個月！換瞉都換過七、八次。換一次大隻少少，換一次大隻少少。宜家變成缸中陀地！我要餵珊瑚都要先交保護費比呢兩位大佬先！若然唔係，就係到攪破壞，煩到死！我伸手入缸做野個陣，佢地夠胆「禽」上我手臀添架！














前排兩隻野生蝦仔，生到成缸都係，蝦子。點知第二朝訓哂，一粒都無剩。眼黎都係做哂D魚既宵夜多囉。