好友變左？|【文章存檔】 - 【好友論壇】- 以足球會好友

離線senal

榮譽會員

發帖: 119823

好友元: 1210540

閱讀權限: 119898

貢獻值: 18

只看樓主倒序閱讀使用道具樓主發表于: 2009-04-08

上年年中無意下 SAVE 低，頭先又咁啱開錯左文件，搵到呢篇野……順便貼返出黎

作者係邊個？呼之欲出啦

其實真係差唔多每隔一段時間，就會見到有人話「唉……好友變左啦……」。咁多年黎，呢個題目幾乎幾個月就聽到人講一次。一兩年就會有人隆重其事咁標題出黎。若然真係既話，好友應該都變得幾緊要。幾個月就要變一變身。不過唔知點解我反而覺得好友黎黎去去都係咁，都無咩變化咁既。
都唔記得六年前定幾多年前，蹅足好友無幾耐，浦左一排，叫左熟左少少人。好快已經聽到好多「老臣子」話，「唉……好友變哂啦！以前繁星個陣唔係咁既！」「十方好友個時都唔係咁既！」無記錯，費南迪斯有咁講。十號球王有咁講。好似早高爾都有咁講。仲有一兩個我都唔記得佢地叫咩名既好友…………
由於我無經歷過繁星、十方，我基本上唔係好知佢地講咩。只係覺得，無野哎，宜家咁幾好哎。有咩唔妥者？後來，慢慢經歷時光流逝。一年兩年後，想唔到，同一番說話會由另一批好友講出。柯南又話「好友唔同左囉」。一兩年後，傑少又話「好友唔同左啦，宜家既好友同我個陣唔同啦！」總之，每過一段時間，就會有人出黎話比大家聽，「好友同以前唔同左」啦。其實好想問，「以前」，即係幾時？
唔知點解，好友有一段時間，係最令人滿意，最令人津津樂道，最美麗快樂。呢段時間，係所有人口中，都係最美好既時光。呢段時間，就係「以前」。咁多年黎，好多人都一直強調，「以前」好好架！「以前」唔係咁架！「以前」正好多！但我尋尋覓覓左咁耐，我就係搵唔到，呢個「以前」即係幾時。
你宜家話「以前」好！即係一年前？但一年前有人話，「宜家」好友唔同左啦，以前好好架！即係，又一年前？但再一年前同一番說話，都有人講過喎。即係，再再一年前？但再再一年前一樣有人咁講………咁即係，幾時既「以前」？連六年前我岩岩黎好友個陣，已經有人話「好友唔同左啦！以前好好架！」咁豈不是，好友呢五六年間，一直係好差，一直都唔好？最好既年代，莫非真係「繁星、十方」個陣？
講真………我又唔係好覺喎………雖則我未經歷過，但睇以前d人講番以前d 野，大概都估到d 既。即係好友自從成立之後，都未好過………
但偏偏，我又唔係咁諗。我成日都話………唔係哎，幾好哎……係咁架啦。小小缺點實有，整體幾好哎。尤其係外面行個圈番黎之後，呢個感覺仲大。若然你搵到一個比好友更好既地方，請你話一話比我聽。我都好想拜訪一下。有時淨係黎好友吹水，吹到悶，都想換下環境。有既麻煩你單聲。
不過，相信以我地咁「嫌尖聲悶」既人黎講，要有好似好友咁就到我地既需要同喜好既論壇未必多囉。唔好誤會，我唔係話好友最好。亦唔係話其他論壇唔好。好過好友既大把。但岩我既，好似暫時只得一家。真慘。
由於人都係鐘意期盼一個理想境界既存在。但理想境界，係人既世界入面，本身就係唔存在，所以好多時，我地都會幻想一個烏托邦（唔係話你呀，索女）出黎！作為一種慰藉。搵唔到一個理想既論壇，就幻想一個出黎。外面搵唔到，就係入面搵。幻想下幻想下，唔知幾時，係幻想之中，好友曾經就係一個理想既烏托邦既化身。但呢個化身並唔係真實既存在。因為理實中好友並唔理想，至少唔係絕對既理想。所以，「以前」既好友就好好多。至於幾時係「以前」………天曉得！總之記憶中，曾經出現過一段時期，係無紛爭，無異見，無吵鬧，完全和平，天下合一，情境交融………曾經係有個一段咁既時間………曾經。
但現實係殘酷既。若然你去到辦公室睇一睇，一頁又一頁咁揭落去，睇番前塵種種。你會驚訝於，原來，紛爭，從來未係好友停止過。咁多年黎，年年月月，大大小小不同既紛爭吵鬧，斷斷續續都係好友出現。根本就無世外桃原呢支歌仔。「以前既好友」由頭到尾都係我地一廂情意幻想出黎既時空。不曾存在過。
你問，好友點解會變？點解會變成咁？你問呢個問題，正正代表你根本唔明白咩係好友！好友係咩？係一個論壇！論壇係咩？係一群人由四方八面集合而黎談天說地既地方。論壇係言論所組成！言論係由個一群人發出。論壇，就係一群人既言論！
咁呢一個群人係咩人？係muly 、柯南、隱、迪克、bellamy、frankie、pwwky、bb、skyline、freezefox、超迪仔、垃圾桶、可、波友、kamiru、黑魔道士比比、jin、新手、十號球王、kch、淺雲、王子托迪、影、remix仔、早高祖、費南迪斯、sunforever、marlet、saha、一劍了、shark、簡東拿、robert仔、………下刪一百個名……
唔好意思，上便班友仔，一半無黎吹水好耐啦。淨番個一半既一半都係吊緊鹽水。一個星期無見到佢一兩次。呢班早期就係好友既好友，呢班將好友成形既好友……好多都已經唔存在啦。唔存在係好友。咁試問，一個以人為本，以人既言論集結為壇既地方，人都唔同哂，言論又點會一樣？好友，有咩可能會唔變？
今日再睇睇版主名單，唔講個d 坐定定好多年，「霸住」個版主位唔郁既。新既版主，邊個唔係年資唔算深，年紀仲好細既一群？年幾兩年前一次同muly 出黎踢波，佢都曾經衝口而出話：「嘩……宜家d 版主個個都好細喎……掂唔掂架？」我同佢講：「有咩唔掂者，你做版主個個時候，你咪一樣係靚仔一名！今日係靚仔者，遲d 會大架啦！」無錯！遲d 會大架嘛！論壇一樣會大。人大左，性格都唔同，諗野又唔同，價值觀都唔同。論壇大左，又豈能不變？我成日講既例子。六年前識bb，小朋友仔，又可愛又得意，六年後既bb，已經唔再係小朋友啦。大個仔啦。我仲成日bb 前bb 後咁叫人，仲成日提住六年前既往事。老人家，你out 啦！你老套呀！變哂啦呢個世界！我都變左中學生啦！仲小朋友！？
好友點可以唔變？點可能永遠都一樣？
第一屆同我爭我最喜愛會員既係邊個？第二屆呢？第三、四屆又如何？除左我係年年都榜上有名之外，大家睇下，年年既奧斯卡最出位個幾個，幾乎年年都唔同。第一屆迪克同我爭得頭崩額裂。第二屆爆迪迪仔出黎。跟手紅既係謝拉傑。紅左一年唔夠，第四屆就比文鳳取代左。然後三郎上位，再然後，今年任天痕、火鳳、國球旗、麻煩、雪綸………一大班「新人」上位………。年年都唔同！奧斯卡係咩？真係最有見地最幽默最有貢獻呀？計爆光率之嘛。個年你爆光率高，個年你咪拎多幾個獎囉！咁你睇番咁多年，得一個老狐係唔識變既，其他年年既「風雲人物」都唔同。一代接一代，每一代都有唔同既活躍係好友既人。你點要求，人換了，言變了，而由人言而成既論壇永恆不變呢？
變，從來未停過。
只係，人總唔肯承認，現在係最好！又唔敢承擔誇口，將來我可以做得更好！所以，往往都悲哀地，回顧前塵，總係「以前最好」………
真係比你番番六年前既好友，你真係會覺得佢係最好？咁咁多年黎我地既努力，我地既建立，我地既傳承，一代接一代，信念既傳承，咪都係白費多餘？咁我地仲攪咁多野做咩？仲努力d 咩？仲要維持d 咩？仲有咩值得我地驕傲、擁戴、保護、愛惜？以前永遠最好既話，何不今日停步，就此作結，好等「以前」永遠存在係你心入面。咁咪最完美囉。
唔好話邊個邊個排擠邊個。論壇，從來都係黨同伐異既地方。咁講好似好難聽。但現實的確係咁。相同嗜好，似類既價值觀既人走埋一齊，自自然然會排擠唔同?好唔同價值觀既人。所謂排擠，唔一定係你所諗既攻擊，傷害。唔岩傾，唔岩咀形，都可以係排擠既一種。你三四個講到嘻嘻哈哈，我插唔到咀，都係一種排擠。只係程度上既差別。好友正正係呢種「黨同伐異」既步伐中成形。所以呢到無人講粗口。因為我地排擠粗口。近排你地好鐘意講「膠」，亦大力排擠「膠」（其實有冇人可以講得出，咩係「膠」？）。於是好幾個被命定係膠既會員，去到邊都被人排擠。你可以話，佢自己?黎，佢抵死。但佢?黎又好，佢抵死又好，佢的確被排擠。我地每年都有類似既人和事出現，久唔久就出現一次半次「大規模式既總動員排擠」。將一個又一個「非我族類」排出論壇以外。呢個係鐵一般既事實。唔好講到好友係人間仙境，唔好講到好友可以容納所有不同聲音！好友從來唔係一個咁既論壇。好友係一個極小眾，極小眾既論壇。佢可以長期「維持優良傳統」，正正係因為長期嚴格地將「非我族類」排擠於外！我地唔係唔可以容納異見，可以。不過唔該你先改變自己，變成我地可以容納既種類，否則，一樣係「沙翁啦啦」！好友既所謂兼容性，友善既壇風，門戶開放，通通根本係基立係森嚴既門栓之下！其他唔駛講，單單睇要註冊成為好友既會員，已經係咁多個論壇之中，最「難」既一個（相對而言而矣，並非真係咁難）。
近排風雲會員某君，所到之處，一樣人見人鬧。佢個人故然係有問題。呢點無容置疑。但觀乎你地所標榜既「好友傳統」，我又唔覺得你地對佢真係咁友好者。我自己就極少鬧佢。我認為佢講到最尾都係最多歸納為「討厭」。討厭既人，唔理唔招惹咪得囉。偏偏大家又好鐘意惹佢，又專登要同佢玩埋一齊。玩一大輪，了到佢作出d 令人反感既行為後，又突然搖身一變，化身正義使者，大義x 然咁直斥其非。我係佢既話，有時都真係會感到無所適從。係你指鬧佢既同時，有冇同時諗「好友以前唔係咁架！」有好友仲好認真咁問：「我覺得係時候要處理呢個會員既問題啦！」我真係好好奇……可以點「處理」？因為佢討厭，所以ban 佢a/c？
咪又係黨同伐異既又一例證。
唔好誤會，我唔係話大家唔岩。我都話左，好友可以維持優良傳統，一定程度上，正正因為佢既排他性。係排盡所有異類之後，入得黎，留得低，生存到既，都係差唔多差唔多類型既人。因為差唔多，所以容易接納，因此造成好友「兼容性強」既假象。無錯，只係假象。好友容他性一d 都唔強。不過，我地追求既正正係呢一種小眾論壇，與信念無衝突。我地又唔係想變做高登個類大壇，無必要好似佢地咁「兼收並蓄」。
所以，下次鬧好友「以前」唔係咁架個種，再諗諗，好友變左？定係你變左？