全城狂煲的 TVB台慶劇《巾幗梟雄之義海豪情》前晚播映大結局，劇中尾段劉醒含笑老死在九妹肩上的感人一幕，終極打低今年最高收視紀錄保持者兼宿敵《公主嫁到》的 287萬觀眾人數，獲 47點最高收視、即 300萬觀眾淚眼捧場；同時段 ATV播出的宗教節目《恩雨之聲》遭《義海》趕絕，竟然輸到零收視，極度慘情。
由黎耀祥、鄧萃雯和陳法拉等主演的無綫人氣劇《巾幗梟雄之義海豪情》前晚播出大結局，全體演員在將軍澳電視廣播城與 800名觀眾齊看結局篇。當播至尾聲，劉醒倒在九妹肩上含笑閉目的催淚一幕，現場的雯女、法拉、胡定欣和馬海倫均睇到喊。
劉醒死得有價，前晚無綫於 11時 23分播映這幕戲時，錄得最高收視 47點（約 300萬觀眾），撼低《公主嫁到》 45點（約 287萬觀眾）最高收視，刷新今年最高收視紀錄，平均收視則有 44點（約 280萬觀眾），不過以全劇平均收視計算，《公主》就以獲逾 214萬觀眾，壓倒《義海》的 210萬觀眾人數。至於亞視前晚 11時播出、撼正《義海》的半小時宗教節目《恩雨之聲》則慘獲零收視。
ATV死撐：節目唔同性質
亞視公關部發言人區先生昨回應說：「《義海》同《恩雨》係兩個唔同性質嘅節目，我哋係常規節目冇調亂時間，但對方就用特備節目，可以理解嘅，其他就唔回應啦。」亞視死撐，無綫更風騷，無綫外事部副總監曾醒明昨日說：「《義海》喺最高收視嘅時段，友台嘅節目零收視，呢個情況真係好罕有，我哋對當晚嘅成績好滿意，副行政主席梁乃鵬博士喺下月 7號會宴請《義海》台前幕後。」
《義海》由首集開始截至上周六（未計結局）， MyTV網上視頻累積勁達 680萬人次，且結局收視披靡，祥仔昨日在電話中說：「 OK啦，諗住破到《大長今》紀錄，但拍到呢部劇好開心。」問祥仔會否增強攞視帝信心？他說：「自己嘅信心指數同之前都係一樣（即三分一）。」會否再跟雯女第三度合作？祥仔說：「唔會啦，華標（編審張華標）都走咗！」
雯女前晚誓言不破《大長今》 50點（約 319萬觀眾）紀錄，「鄭九妹」三個字調轉寫，她昨晚在柴灣拍攝健康產品廣告時，言而有信笑說：「妹九鄭。」亞視收視捧蛋，身為基督徒的雯女卻撐道：「咁又唔好，《恩雨之聲》都係傳福音。」雯女稱對爭視后有信心，還笑說：「佘詩曼嘅角色好開心，做得好，我應該攞飛躍獎，有經驗嘅演員要攞唔易。」
http://hk.apple.nextmedia.com/template/apple/art_main.php?iss_id=20101130&sec_id=462&subsec_id=463&art_id=14714171 
甘犀利
