求驗客手記︰四張幾都獲江蘇睇中
韋利復出搵人仔？
韋利復出踢中超江蘇蘇寧？唔係啩！中超球隊真係有錢到儍咗？竟然搵個差唔多掛咗靴七年、43歲大叔復出！雖然係韋利親口講，但內地網民都唔信，當笑話咁睇，有人調侃話：「你哋簽埋巴迪斯圖達返嚟，我從此就做蘇寧球迷！」
減完磅都近200磅
43歲韋利幾日前喺ig話：「早晨，你哋的Bobo返嚟嘞，我決定去中國踢波。五個月前，我有101公斤重，家陣減咗10公斤，我會再接再厲，減到89公斤（約195磅）！」意大利《米蘭體育報》指韋利同蘇寧傾緊轉會，好快有結果，雖然呢份報章強調唔係講笑，但內地網民唔多信，當係笑話。
有個叫李香蘭的網民話：「你哋簽埋巴迪斯圖達，我從此做蘇寧球迷！」網民弦歌微雨就話：「我只要馬勒當拿同朗拿度。」好多人仲想睇比利、碧根鮑華等復出踢中超；更有網民拎死人嚟開玩笑，話迪史提芬奴熱緊身，準備嚟中超，李惠堂亦會還陽加盟廣州恒大喎。正經少少網民就話中超唔係老人院，鬧蘇寧人儍錢多，韋利踢中超會係對聯賽最大的諷刺。我求大俠亦抱懷疑態度，蘇寧的轉會策略係高價買當打球星，例如阿歷士泰斯拿同拉美利斯，點會突然簽老鬼呢？同埋韋利只係講去中國踢波，冇話係中超定中甲，可能只係嚟中國踢啲商業性或慈善性的友賽都唔定。
男女通殺萬人迷
可能年輕球迷唔太認識韋利，等我求大俠介紹番。韋利係前意大利國腳前鋒，當打嗰陣好似坦克車，頭頂腳踢都冇問題，勁過杜奧巴。99年佢由拉素轉會國際米蘭嗰陣刷新當時轉會費紀錄，身價達4,900萬歐元（約4.3億港元），之後喺國米仲做過意甲神射手。外號Bobo韋利好受球迷歡迎，本身係花花公子，「食」女無數，但外界一直懷疑佢性取向，因為佢同意大利前鋒拍檔恩沙基關係好到情侶一樣。
其實球壇有唔少復出先例，最近港超標準灝天請到卓卓出山；英格蘭射手舒寧咸舊年亦掛靴七年後復出，喺史提芬納治做球員兼領隊。超過40歲仲踢緊名將，有三浦知良、舒華沙同薛羅拔圖等（見附表）。
http://hk.apple.nextmedia.com/sports/art/20160804/19722144
