自從事旦男舉牌之後，衝住 TVB而嚟嘅批評聲音就一浪接一浪，除咗新聞取向被人質疑，連《大咕窿》、《美女廚房》同《獎門人》等遊戲節目都惹起公憤，但今次炮轟無綫嘅唔係乜嘢事旦男、鹵味男或者背心男，而係環保觸覺同地球之友呢兩個環保團體。佢哋針對嘅係呢三個節目浪費發泡膠、虐待動物同浪費食物，唔環保兼教壞細路。
等同浪費 42000個飯盒
環保觸覺同地球之友話，呢排已經收到過十宗市民投訴，狂鬧近期加碼到星期一至五都播出嘅《大咕窿》浪費發泡膠。環保觸覺話，《大咕窿》每塊佈景板大約 2米乘 4米乘 0.2米，換言之體積大約係 1.6立方米，相等於 7,000個飯盒，以每晚節目使用 6塊發泡膠板計，一晚已經耗用咗相等於 42,000個飯盒。佢哋仲喺 facebook成立咗個「反對無綫假環保，要求停播大咕窿」群組，已經有超過 600人加入聲討無綫。
至於《美女廚房》，環保觸覺就批評嗰啲所謂美女嘉賓，集集都表現得好雞手鴨腳咁去劏一隻隻活生生嘅動物，實則係虐待緊啲瀕死嘅動物，要佢哋承受不必要嘅痛苦同驚恐。《獎門人》亦唔好得幾多，班主持同嘉賓拎啲食物四圍掟，浪費又唔環保，最怕小朋友睇完之後有樣學樣。
面對一連串指控，無綫電視外事部副總監曾醒明話，向外國購買《大咕窿》遊戲版權時，對方指定要用發泡膠做佈景板，因為關乎嘉賓安全同節目趣味性。
聲稱發泡膠可變道具
佢強調啲發泡膠會循環再用，譬如用嚟做古裝劇入面啲假山同雪粒之類嘅道具。至於其餘兩個節目被人話虐待動物同浪費食物，無綫已經檢討過，會加快程序同將食物份量減到最低喎。
其實早排廣管局嗰三場公聽會上，已經有唔少人即場向無綫總經理陳志雲投訴，《美女廚房》、《大咕窿》呢類節目淨係識搵啲女藝人、 o靚模上去賣弄性感。八方就覺得，無綫啲節目最大問題係冇創意，好似《大咕窿》咁，人哋外國已經做到唔做；《超級巨聲》又擺明抄內地嘅《超級女聲》同台灣嘅《星光大道》。成日抄抄抄，真係悶死人。
http://hk.apple.nextmedia.com/template/apple/art_main.php?iss_id=20090803&sec_id=4104&art_id=13056308
