其實如果當利記係Dortmund 2.0 project的話, 兩者的行車路線都有相似的地方.
Klopp係多仔教咗7年, 一開始兩季第6同第5完成, 跟住黃金期的四年, 第1, 第1, 第2, 第2, 一時無兩. 到第7季, 2014/15, 忽然間兵敗如山倒.
如果宜家的利記, 半季4和6負28分係失望的話, 多蒙特個時係半季19場後, 係4和11負16分!! 係降班邊緣!!!!!
多蒙特果時的情況, 某方面係成隊都幾側重Lewandowski, 佢係2014夏天離開, 球隊引入Immobile但第一季又未上力, 但好在Aubameyang+Reus都頂到下, 少少似今季Mane離隊, 但Nunez都頂到下, 都未至於係最大死因. 另一方面, Dortmund本身的班底唔算好厚, 一隊好強, 二隊好多deadwood, 出一線同二線人差好遠, 成隊利記翻版咁. 而最似曾相識的, 踼咗4季的heavy metal, D一隊球員基本上係傷的傷, 攰的攰, 後繼無力了, 佢地已經無中場老化的問題, 但成班當打之年都係咁. 2014/15係Klopp係Dortmund經歷最嚴重傷患的一季, 之前四季所用盡的體力心力, 一次過找卡數還清. Dortmund最大對手拜仁, 都有類似長期push球員到體力極點的問題, 但人地人多, 錢多, 二隊兵力強, 能夠足夠輪換. 係唔係好似好似曾相識? 當然係, 拜仁當年的領隊, 就係Guardiola.
一隊無限金錢, 一隊有限米. 去到今季, 認真體驗到Klopp下其實係將一隊原本只可以年年爭第4的球隊, 一下「焗起」到可以爭冠. 但佢唔係魔法師, 唔可以無中生有, 更似一個煉金術師, 要等價交換, 之前焗盡, 終要找數.
