引用第370樓sun於2008-02-14 18:01發表的“”:
咁你有無睇過呢? [表情]
報紙囉。雜誌囉。因為個d 我本來都買黎睇。
我真係一張都無睇過。唔係 因為清高！係因為唔得閒。呢單野發生個陣，我正正係國內同d 外發商周旋緊，飯都無時間食，邊有時間八八卦卦？
我唔係偽善到話我唔會睇呢d 相，講真，若然我個排得閒，或者我都有機會睇到。但我相信睇幾張我都夠哂，唔會又求相又儲閃卡咁誇張。有人send比我，咪睇下囉。同埋，我九成唔會再SEND比人。因為麻煩。講真睇多幾張，張張都差唔多啦。
唔好誤會，我唔係聲討睇相既人。我都話左，好奇心人皆有之。d 相又隨處可得，鬼咁容易。睇咪睇囉。正如好多人都話，佢地自己on車者。影埋d 咁既相。
本來，大家都係八八卦卦咁睇咸相者，大家柴娃娃咁，八完咪算囉！唔知幾時，大家變變下變成道德判官，睇咸相既判被人公開私隱既人有罪………令人摸不著頭腦…………就好似阿嬌出黎交代，好多人好似好唔滿意咁！喂！大佬！你想佢講咩呀？正如郁民話齋，交代佢呢幾年同陳生既關係以滿足大家進一步既八卦慾望呀？喂！呢d 野佢好似無必要向你交代架喎！基本上，佢根本無野好講！宜家出黎默認衰左啦！以前既野我唔想再提啦！咪咁多囉！仲可以講咩呢？然後有人竟然用阿嬌「惹怒」奇拿為新聞標題，講到奇拿成個正義超人咁，因為阿嬌唔肯「好好交代」，宜家要罰佢……嘩，仲有冇本未倒置d 呀？
呢班人既私生活咁混亂！批評係絕對正確既！但我只係對大家一路傳閱人地既私隱相片然後又一路批評人地道德敗壞呢個現象感到好奇怪囉……即係，你偷窺緊，就咪出聲，靜靜咁睇戲咁睇啦！你要出黎閙，一係你好似郁民咁口響：「我一張都無睇過！」咁你先可以鬧得響口架嘛………
