Chan Wai Ho
13 hrs ·
其實好多記者朋友都成日問我同樣問題，香港隊用多啲本地球員年青球員好？定係用大部份入藉球員去為港隊爭成績呢？其實各有各好處，睇你自己想要乜啫，我可以分享少少自己十幾年港隊生涯經歷過d野，等大家去自己搵答案！
2000年踢港隊時期，其實都有入藉兵有國援，不過比例上只佔極少數，所以都係以本地球員做主導角色，「老中青」球員分佈平均，所以當時港隊正處於一個健康發展情況。
但當02/03開始，香港球圈正處於冰河時期，球員收入大減，球圈前景唔明朗，所以好多當打球員都選擇轉行，跟住形成一個惡性循環，好球員少左，球賽質素下降，加上少數好球員都「歸晒邊」去晒兩三隊球隊，聯賽競爭性降低，變相令留意香港足球的人也越來越少，同樣，留意香港隊的人亦都唔多得去邊！
到港隊用全華班球員的時候，係，明顯令到本地球員多左機會去踢國際賽，青年球員亦多左機會去入選經驗，但當代表隊踢唔出成績的時候，球迷唔會有耐性去等你進步，輸多贏少，佢地可能會少左入場支持，或者有部分人會入場喝倒采同埋鬧球員的都有，試問有幾多球員會繼續想為球隊付出呢？唔怕坦白講，有時港隊要作客一D落後地方，或者撞啱抖暑放假的時候，有少部分球員係會選擇性受傷而放棄入選，可能佢地唔覺得踢代表隊係球員的一份使命，但呢樣野，其實有機會係當時球圈環境所做成的！
呢幾年的代表隊同以前最大分別係咩？
就係「主動」同「被動」！
依家代表隊球員係多左一份「優越感」，因為每逢港隊有比賽，各大小媒體都會主動報導，足球員喺社會地位比以前高，係好事，起碼有時會有一D國際品 牌會搵本地球員合作(冇錯，我係唔小心講緊自己😅)，多左好多人有興趣留意香港足球，亦令每個球員都好「主動」爭取機會希望能夠成為港隊其中之一分子，正常架，有邊個球員唔想多D人留意自己？認同自己？相比以前，球員冇咁積極爭取機會，你選...咪踢囉(被動)，呢個係以前同依家最大分別。
其實講到底，用咩球員都冇問題，最緊要明白，冇成績，乜都假！
香港足球近年多左人留意，全因為代表隊呢兩三年有成績有表現而換黎的成果！
對投資足球的人黎講，冇成績，咪唔玩囉。
對領隊教練黎講，冇成績，咪講拜拜囉。
對球員黎講，冇成績，球員價值咪降低左囉。
對球會黎講，冇成績，咪自降囉。
足球世界好現實，冇對與錯，成敗論英雄！
如果以今場比賽黎睇，對住西亞球隊，喺大部份時間打少個兼落後一球的情況下，都可以同對手互有攻守，鬥到完場，我絕對覺得收貨兼超岀預期，雖然輸波，但表現值得讚賞，繼續努力啦！記住，香港精神唔應該只係22連勝紀錄，應該係我呢場輸左，下場我要贏返，吹咩！
