武俠小說泰斗金庸逝世 享年94歲 [復制鏈接]

麻凡:三甲？未必，仲有獨孤求敗，東方不敗，石破天，無涯子，黃裳，王重陽，林朝英，張三峰，當然仲有掃地僧，呢堆人都應該好打過張無忌~[表情] (2018-11-01 01:10) 

你有冇睇我寫咩架？


睇多次！

freezefox:你有冇睇我寫咩架？
睇多次！ (2018-11-01 10:23) 

OK, 主角嘛, 郭靖同楊過應該都不會比張無忌差, 仲有天龍八部, 呢本野基本上成本書的武功層次都高出其他書的角色幾班, 求其講一個卓不凡都可以練劍練到有劍芒, 這基本上是激光鎗了, 但仍被虛竹輕易KO, 所以天龍三兄弟都肯定勁過張無忌, 仲有石破天, 勁到離地, 佢既武功已經超越武俠小說, 可列入玄幻系列, 很肯定都勁過張無忌, 仲有越女劍的阿青, 時代係眾多作品中最早, 根據金庸時代越早武功越勁的潛規則, 再加上佢的實戰成績---------只靠一條竹已經可以獨自出入戰場, 掃低二千多士兵, 亦肯定勁過張無忌~~~

麻凡:OK, 主角嘛, 郭靖同楊過應該都不會比張無忌差, 仲有天龍八部, 呢本野基本上成本書的武功層次都高出其他書的角色幾班, 求其講一個卓不凡都可以練劍練到有劍芒, 這基本上是激光鎗了, 但仍被虛竹輕易KO, 所以天龍三兄弟都肯定勁過張無忌, 仲有石破天, 勁到離地, 佢既武功已經超越武 .. (2018-11-01 12:10) 

虛竹內力深厚，但全靠外力，根本唔係自己功夫。加上實戰經驗少。真係打起上黎，睇怕打得贏佢既人排隊排到街尾。

段譽就算吧啦⋯⋯⋯

唯一喬峰係真係武功高強，實戰經驗豐富。但睇黎都仲比張無忌差少少。始終，九陽神功＋聖火令＋挪移，咁既組合實在太屈機了吧。相比喬峰一味降龍十八掌。戰力也許相約，但內力感覺稍遜半籌。

郭靖楊過不會比張無忌差，但亦唔見得比佢高。可能係伯仲之間吧。

越女劍我就真係無咩印象了。

不過呢D野，都係吹下水，又無真係打過。天曉得邊個勁。



東邪南帝西毒北丐，身處同一時代，打過咁多場，尚且未必可以論排名。何況一班身處不同時代，根本都無機會交手既一班主角？反正，你覺得佢最勁，佢就係最勁個個囉。

就等如宜家D 人咬C朗勁D 定 朗拿度勁D ，定朗拿顛佬勁D ⋯⋯⋯⋯咬天光都咬唔完。

不過三部曲入面
我反而覺得郭靖先成日被低估
佢九陰內功+十八掌+空明拳+左右互搏其實係好屈

楊過就真係打天才波
識既武功應該係最雜
有玄鐵/黯然銷魂時期又加乘

張無忌係太過op，而且倚天時期除左張三豐
比起前兩部已經冇太多高手
唔同上兩部有得華山論劍
倚天六大派個d真係唔好提了
同佢同level既好似冇咩，過份屈機

不過如果計哂
其實天龍個三件都幾癲

不過尋日睇電視，成班拍左查大俠小說既電視劇幾十年既演員，又話幾崇拜佢又話幾尊敬佢，但開口埋口都係「茶良鏞」、「茶先生」、「茶大俠」⋯⋯⋯聽得好「UN」耳⋯⋯⋯叫錯人地個姓幾十年⋯⋯⋯

喬峰最唔同係一開始已經係高手
降龍都係佢減走十掌變十八掌
又集少林丐幫兩家之長
而且唔好忘記，唯一打傷掃地憎都係佢

Btw其實新修版喬峰仲教埋虛竹十八掌同打狗棒法

不過都係老狐話齋
唔同年代好難比

freezefox:不過呢D野，都係吹下水，又無真係打過。天曉得邊個勁。
東邪南帝西毒北丐，身處同一時代，打過咁多場，尚且未必可以論排名。何況一班身處不同時代，根本都無機會交手既一班主角？反正，你覺得佢最勁，佢就係最勁個個囉。
....... (2018-11-01 12:28) 

吹下水分享下幾好呀
證明大家各有心水

個人最愛北喬峰~~

主角黎講

邊套作品都有不同特色，各有所好，但講最重要，最偉大的，我覺得肯定係射鵰，或射鵰三部曲，因為基本上係完整架構好整個江湖武林，很多後來的武俠小說家所書的江湖都係沿自於此。於是近代各地華人們所熟悉的，腦中對於江湖的畫面，關係，分佈等等，都可以說是金庸的江湖。
我最喜歡笑傲江湖，但硬係唔太滿意任我行提早領飯盒呢個結局，第二愛是天龍八部，好神奇地十年前問我會係三部曲或鹿鼎記，但最近每次翻睇我都有新發現，有更多深思，天龍係我由最初第一印象係唔太喜歡(因為段譽),  到越來越喜歡，有可能再過十年已經超過笑傲在我心中的地位。
其餘三部及鹿鼎我都很喜，無分大細~~

freezefox:不過尋日睇電視，成班拍左查大俠小說既電視劇幾十年既演員，又話幾崇拜佢又話幾尊敬佢，但開口埋口都係「茶良鏞」、「茶先生」、「茶大俠」⋯⋯⋯聽得好「UN」耳⋯⋯⋯叫錯人地個姓幾十年⋯⋯⋯ (2018-11-01 12:47) 

叫錯? 咩意思，唔係好明...

羅力亞:不過三部曲入面
我反而覺得郭靖先成日被低估
佢九陰內功+十八掌+空明拳+左右互搏其實係好屈
楊過就真係打天才波
....... (2018-11-01 12:45) 

天龍三兄弟真係幾癲的, 基本上成本天龍既人都好癲, 好多二線角色都勁到無論, 蕭遠山, 慕容博, 李秋水, 天山童姥, 無崖子, 甚至掃地僧及隱藏的超級怪物逍遙子等.....次一級的游坦之呀卓不凡呀鳩摩智呀等都其他小說裡都絕對係主角級數, 相反好多主角例如令狐沖去到天龍都會變二打六。
北冥神功係完美版吸星大法, 凌波微步係輕功的極致, 一經施展, 無人掂到, 仲有六脈神劍(激光槍!), 擒龍功(隔空取物!!), 白虹掌(搖控掌勁!!), 降龍十八掌(十丈外感到掌風!!!) 呢堆全部都係遠程攻擊, 係射鵰裡係無的, 金庸真係放左好多心思係天龍的武功創作上................

ODIN:叫錯? 咩意思，唔係好明... (2018-11-01 14:43) 

查，作為姓氏，該讀「渣」，不應讀作「茶」。


一般讀者唔知，唔出奇。喂，你識左人幾十年，又話拜候過人，又話同人幾熟幾熟，連人地個姓都讀錯？

麻凡:邊套作品都有不同特色，各有所好，但講最重要，最偉大的，我覺得肯定係射鵰，或射鵰三部曲，因為基本上係完整架構好整個江湖武林，很多後來的武俠小說家所書的江湖都係沿自於此。於是近代各地華人們所熟悉的，腦中對於江湖的畫面，關係，分佈等等，都可以說是金庸的江湖。
我最喜 .. (2018-11-01 13:24) 

金庸小說之所以咁經典，除左係寫得精采外，忠於歷史，考究歷史，都係一個重要原因。而且係好重要既原因。 其他同期既小說作家，左，奇幻有餘，精采有餘，但係就點到做唔到金庸作品個種充滿史詩式既氣勢！個種歷史洪流下各種人和事的精神面貌！個種深厚既文化氣息！佢寫一段好簡單既情節，背後可能做左好多考據同研究！每每都有出處，都有典故！呢D都係金庸小說成為殿堂級經典既重要元素。


所以睇金庸小說，我例必睇埋佢書尾既註釋，全部都係學問所在！