唔經唔覺，車路士大軍已經來港數日，一眾「餓狼」亦陸續流露原始一面！車仔「法語四星」尋日率先組四箭頭覓食，其中沙洛文卡勞喺中環「右路爆破」，落底喪追混血女；安歷卡仲離譜，女粉絲上前合照竟「快開罰球」搶住「抄牌」，唔夠十分鐘就SMS對方夜蒲，真係追女高手。
車路士前日踢完首場巴克萊亞洲錦標賽大勝傑志四比○後，球員心情相對輕鬆，「香港通」杜奧巴繼續帶住安歷卡、馬隆達及沙洛文卡勞去到中環食飯購物，感受一下「自由行」生活態度。
攝位抄牌 10分鐘「起腳」
四人喺中環某酒店食完Lunch後，就轉戰IFC國金商場行街，期間有不少追星族要求合照簽名，四人都好識做盡量滿足粉絲。其中一名樣貌標致「女車迷」更深得四人歡心，呢位美少女問杜奧巴尋晚去邊以方便追星，殊不知在旁嘅安歷卡立即攝位「抄牌」，成功獲得該位美少女電話號碼。
安歷卡道別唔夠十分鐘，已立即傳SMS畀女粉絲，原句為：「May b i see u tonite but im not sure..I let u know」意思係今晚或許會出來見面，但仍未能確定，我再覆你。
沙洛文卡勞當街嘜豹妹
眼見「巴打」有着落，沙洛文卡勞亦心雄起來，四人喺中環鬧市行行吓，眼見一名身穿豹紋性感熱褲嘅「混血索女」在遠處掠過，沙洛文卡勞即時使出慣常爆破伎倆喪追。雖然「混血女」唔知沙洛文卡勞係球星，但呢位科特迪瓦國腳毫不介意，仲慢慢介紹自己係車路士球星，最終成功交換「老冧」，跟住幾日有冇下文就要下回分解咯！
http://football.on.cc/football/new/20110729/fbnewc0101x0.html
