友人的blog.
擊節
再評<小寶與康熙>中的韋小寶
無可否認, 張衛健飾演的韋小寶深入香港觀眾的心, 劇集播放期間, 街頭街尾都會聽到o的小朋友大唱「涼風有信」. 不過, 今次(即係本少爺第三次)重睇<小寶與康熙>, 發覺王晶改篇, 張衛健演繹的韋小寶其實算唔上一個咩人物, 古靈精乖有餘而情義不足, 開始有少少乞我憎.
韋小寶口口聲聲話自己乜野都無, 最講義氣. 救陳近南為左義氣, 救天地會人馬又因為義氣, 幫康熙手又係為左義氣, 保護九難師太又係為左義氣, 乜叉都話為左義氣!!! 但到頭來皇帝仔知道佢係間碟, 要通緝佢, 佢又要求胡德帝俾佢退會, 話:「我做人真係好辛苦, 小寶真係唔識點做」咁點解你一開波又要妄想可以面面俱圓? 又要做鹿鼎公, 又要做青木堂堂主, 又要做白龍使, 咁你玩哂啦?
就係因為以為自己可以玩哂, 所以鑄下彌天大錯, 搞到自己都唔再識做人.
大家後生o既時侯, 又有邊個未試過係咁?
不過, 佢最衰o既係處事手法幼稚. 成人懶係有情有義, 對成班女人可以大大聲話個個都一樣咁愛, 邊個有事就救邊個, 邊個需要佢多o的就接近多o的邊個. 對鐘意o既人發一o的不著邊際o既誓, 咁係愛? 你地仲記得以前拍拖果時情到濃時就同對方講一生一世嘛? 「誰人又相信一世一生這膚淺對白?」小寶的愛情, 是屬於中學時期那些「激情」, 毫無理智, 卻自喻「至情至性」, <小寶與康熙>那首插曲的歌詞, 就係咁講:「狂情至性怎會懂得灰? 年輕不怕後悔」
再講韋小寶口中o既「義氣」. 咩叫義氣? 有好多人以為義氣就係「義」. 古語有云: 義者宜也. 簡單黎講就係係適當o既時侯做適當o既事, 屬於大是大非. 至於義氣, 其實可以解釋為人與人之間一種不可以明狀的奇妙感情, 不太理性, 認為要幫就幫, 要救就救, 無利益考慮, 率性而為, 通常有親疏之別. 學生甲偷野, 學生乙係佢老死, 雖然知道真相, 但為甲掩飾, 是為「義氣」. 如果學生乙能夠了解被偷野同學o既慘況而告發甲, 是為大義滅親, 先賢謂之曰「義」
我明白韋小寶不懂甚麼叫做大仁大義, 因為佢讀得書少, 我都一樣, 未必能夠行「義」, 但我比小寶明白乜野叫「義氣」. 正如以上所講, 義氣有親疏之別, 你係人都講義氣, 對康熙又講, 陳近南又講, 多隆又講, 門口守衛又講, 人人都係你兄弟而忽略「兄弟」間o既對立面, 到最後不單令到自己受苦, 亦令到「兄弟」們失望痛心. 究竟係你當人係兄弟還是契弟? 你咁做係成熟定幼稚?
開始明白點解當年中四o既我會咁鐘意張衛健飾演o既韋小寶, 因為佢以為自己已經長大, 成熟得足以面面俱圓, 「全世界我玩哂!!!」, 誰不知原來係何其幼稚. 晚晚聽到小寶對「兄弟」, 對「老婆仔」的金句, 都差點笑出聲音來...
可笑的是我
