迪馬利亞一到，曼聯冇晒 R？英國傳媒話，好多魔迷爭住印「天使」件新波衫，搞到球衣專門店入面嘅 R 印字冇晒，同 J 字一齊缺貨。我求大俠就認為，R 字缺貨應該唔太關迪馬利亞事，原因應該喺安達靴里拉身上，因為佢個名足足有 4 個 R！
「天使」落實加盟前幾日，已經有消息指佢會着 7 號球衣，所以有啲球迷急急腳去印字，搞到曼聯喺英國嘅球衣專門店周一貼出告示，話 R 同 J 呢兩個字母俾人印晒，暫時缺貨。
其實曼聯唔夠 R 字用都可以理解，球隊入面最賣得波衫嘅兩大球星朗尼同尹佩斯，咁啱兩位個名都有 R。唔單止咁，曼聯今夏簽咗嗰 3 位新兵，其中安達靴里拉同馬高斯盧祖個名入面都勁多 R，靴里拉仲要屈機到有 4 個 R 咁多，而盧祖都有兩個 R，再加埋卡域克同湯卡華利等，難怪啲 R 唔夠印。
睇嚟專門店方面都收唔到內部消息，估唔到曼聯一次過簽咁多個名有 R 嘅人返嚟。至於J字冇貨，我求大俠就覺得同贊奴沙有關，一來贊奴沙個名有兩個 J（Januzaj），二來佢換咗冧巴，應該好多人想印佢件新 11 號。
