《玩嘢王》惹怒無綫
被迫造假呃觀眾
《玩嘢王》因為玩得夠真，所以好睇，但原來之後呢幾集，都係假玩嘢。
《玩嘢王》最好玩嘅地方係，真係玩你，而且係用一個真嘅節目去整蠱你，好似上次阿Bob同馬賽BB咁，仲有周家蔚玩測謊機爆床事，幾好睇，仲錄得20點收視，即約128萬人次收看。但亦令好多被玩藝人非常不滿。就攞番周家蔚嚟講，李思捷同江欣燕夾埋一齊整蠱佢，思捷仲越玩越過火，唔跟同欣欣夾好嘅稿，直頭問周家蔚大肚時老公洪天明「點解決」、鍾意乜嘢姿勢等等。事後天明大怒，搵監製理論，所以嗱嗱聲剪走更三級嘅內容。所以之前大家睇到嘅版本，已經「比較乾淨」。
為求收視，為求噱頭，李思捷真係去到盡，得罪一眾好友亦在所不惜，仲突然爆肚，令成team人亦感頭痛，藝人無啦啦被擺上枱出醜，更是投訴不絕，依家一見李思捷都驚咗佢。
之前思捷話咁多集《玩嘢王》已經拍晒，但今日有報道話，原來節目初出街嗰陣仲拍緊。依家藝員科因為收到唔少被玩藝人投訴，為保資產形象，故藝員科出手，凡李思捷搵嘉賓上節目，一律拒絕，除非肯
將被玩內容同對白俾該藝員睇咗先，即係話:做假囉。 報道話，好似
上周陳智燊被玩一集，主力都係見陳生儍更更驚驚青青個樣，唔見得點玩整蠱佢，查實陳智燊一早知發生乜嘢事，整個浮誇表情就交到貨，總之唔使佢犧牲靚仔樣。該報道仲話，之後幾集都係咁，有晒劇本俾被整蠱嘅藝員睇，所有「上當」同「受騙」表情，都係假，做戲咁做。
查實都有眼你睇，《玩嘢王》嘅卡士，已由鍾嘉欣BB、馬賽BB等，跌到落陳智燊BB，雖然話包底有個林欣彤睇吓，但吸引力肯定不及一眾小生花旦。據知李思捷本想《玩嘢王》添食，不過依家搞到神憎鬼厭，冇人落疊，仲得罪咁多人。呢個如意算盤，打唔響。七集就完。
阿Bob，係堅嘅。
嘉欣BB，係夾計整蠱魔術師嘅。
陳智燊，據聞係流嘅。
