【太陽報專訊】近年備受力捧的黃翠如在前晚無綫播出的一集節目中，被一群精壯的老外球員推倒在地上「慶祝」她入波，成班人加埋十幾廿隻手齊齊伸往翠如BB身上，場面震撼！混亂間有人疑似乘機「胸襲」翠如BB，令一班網友大感肉赤！
適逢2014年巴西世界盃快將開鑼，黃翠如跟洪永城早前拍攝節目《走過足球聖地》，齊齊走訪世界各地介紹不同地方的足球文化。出名夠搏又玩得的翠如BB在前晚無綫播出的一集《走》中被一群高大精壯的外籍猛男「施襲」，險些上下「失守」！該集講述翠如BB跟洪永城到位於英國曼徹斯特（Manchester）的球場跟一班外籍球員踢波，片中翠如BB在龍門「放水」下成功入波後，身後一群威猛的外籍球員即熱情地埋身替她「慶祝」，身形纖瘦的翠如BB被一下子推倒地上，隨後成班大男人便一窩蜂擁上前「張牙舞爪」，加加埋埋十幾廿隻手同時伸往翠如BB身上，被壓在地上的翠如BB動彈不得，混亂間鏡頭更拍到有人疑似趁亂施以「龍爪手」襲向翠如BB胸部，片段播出後旋即被網民截圖及在網上瘋傳，不少網民均留言表示對場面感到「震驚」，擔心翠如BB被人抽水亂摸，又謂她被扶起時的表情「似畀人蹂躪完咁」！
同志球員似姊妹
記者昨日聯絡上翠如BB，問到拍攝該集節目時有否被男性球員抽水？她坦言對該集節目仍有印象，並表示跟她拍攝的外籍球員都是同性戀，跟他們情同姊妹：「記得嗰集係喺英國曼徹斯特度拍，嗰度係同性戀者嘅天堂，有好多古靈精怪嘅球隊。當日拍攝嘅係同志足球隊，同佢哋就好似姊妹咁。」她又透露原本劇本安排並不是「推倒」她再慶祝，只是場面混亂所致，沒感覺到有人趁亂抽水：「拍嗰時我好想入波，連個龍門都做戲畀我入，原本諗住喺入波之後拋起我慶祝，點知佢哋一衝埋嚟就撞跌埋我，就順勢攬住我慶祝先有啲混亂咁，我完全冇Feel到抽水呢樣嘢，嗰時亦都冇想到呢樣嘢，因為佢哋真係好Nice！」
向男友蕭正楠備案
問到翠如BB用雙手護胸是否因為被人掂到胸部？她說：「唔關事，呢個本能反應嚟。」談到有網友心疼她被人「蹂躪」，她笑說：「蹂躪就Over咗，佢哋好Nice，拍完大家都有一齊傾心事，佢哋嚟曼徹斯特想搵男朋友。」而翠如BB的男友蕭正楠表示女友一早已向他「備案」，翠如BB亦冇被人抽水，他說：「哦！冇乜嘢，翠如之前都有同我講過。佢哋都係同志球員，踢波時大家都好開心，佢哋都好嗲，冇抽水事件發生過。」
冇睇, 有冇圖?
